سوبمندی مئیگ انت، دلیری، پگری ءُ تمردی ءَ گوں اے جھد دیم ءَ برگی انت – ڈاکٹر ماہ رنگ بلوچ

ما اے گال کریک ڈاؤن ءَ ھم رد کارمرد کنگائیں مئے سر ءَ کریک ڈاون کنگ نہ بوگ ءَ انت بلکیں ما کالونیل زوراکی ءِ دیمپانی ءَ کنگ ءَ انت – ڈاکٹر ماہ رنگ بلوچ

بلوچ یکجھتی کمیٹی ءِ سروک ڈاکٹر ماہ رنگ بلوچ ءَ چہ ہدہ جیل شال ءَ وتی کلوہ ءِ تہ ءَ گوشتگ کہ مروچی مئے واستا اے زانگ المی انت کہ مارا چی کنگی انت – مروچی کہ من تھاریں کوٹی ءَ اے نمدی ءَ نبشتہ کنگ ءَ آں اے وھدی مئے گل ءُ زرمبشت ترندیں ریاستی زوراکیانی دیمپانی ءَ کنگ ءَ انت – مئے بازیں سنگتے بندیگ جاھاں بند انت ءُ بندیگ جاہ ءَ ڈن مئے گل ءِ سر ءَ بندش جنگ بوتگ – منی نز ءَ پہ مئے واستا مستریں جست یا جیڑہ اے نہ انت کہ ما لٹ شاپ کنگ بوگ ءَ ایں، مارا دزگیر کنگ بوگ ءَ ایں یا ما بندیگ جاھاں بند انت بلکیں منی نز ءَ مستریں جست ایش انت کہ مارا اے جاوراں چی کنگی ایں؟ اگاں ما ایشی ءِ سر ءَ سوچ پگر کنگ ءَ بگیر دیم ءَ رؤگ ءِ جھد ءَ بہ کن ایں گڑا بوت کنت ما بستار ءِ گل دیم ءَ شت کُت مہ کن ایں –

آئی ءَ وتی کلوہ ءِ تہ ءَ گوشتگ کہ وھدیکہ من دزگیر بوتگ آں، منی سنگت دزگیر کنگ بوتگ انت، گل ءِ سر ءَ زوراکی ءِ ( کریک ڈاؤن) ( بلے ما اے گال کریک ڈاؤن ءَ ھم رد کارمرد کنگائیں مئے سر ءَ کریک ڈاون کنگ بوگ ءَ نہ ایں بلکیں ما کالونیل زوراکی ءِ دیمپانی ءَ کنگ ءَ ایں ) بندات بوتگ – مارا پیسرا ھم ھمے اندازہ بوتگ ات کہ مئے ءُ مئے گل ءِ سر ءَ اے جاور اتک کن انت بلے پد ءَ ھم مارا جاورانی جھلانکی ءَ ٹپاسگ المی انت-

کلوہ ءَ آئی ءَ نبشتگ کی منی نز ءَ لٹ، دزگیری، بندیگی ءِ مٹ ءَ مزنیں کچے ءَ زھرشانی نہ بوگ بے سوبی ءِ نشانی نہ انت ءُ من اے دابیں گپانی سر ءَ تُشے ھم باور نہ کناں – منی نز ءَ سیاسی ءُ پگری پدگنزگ بے سوبی یے – وھدیکہ ما سیاسی ءُ پگری پدکنز بہ بہ ایں یا نابود بہ بہ ایں گڑا ھما روچ مئے بے سوبی ءِ روچ بیت – اے جاوراں مئے ایندگہ زمہ داریانی ھواری ءَ یک زمہ داری ءِ ایش انت ما بستار ءِ سیاسی باسک وت ءَ وت چوں سیاسی ءُ پگری پدکنزی ءَ بہ پھریزیں – پگری پدکنزی ءَ وتی پھریزگ ءِ مستریں سوب گل انت بلے ایوک ءَ گل ءِ بوگ بس نہ انت بلکیں گل ءِ بنجاہ ءَ یک سیاسی سما ءِ ھست بوگ ھم المی انت کہ یک سرجمیں نیٹ (جالی) ءِ وڑ ءَ یونٹ ءَ بگر تاں بنجاہ ءَ درسیں کیڈر ءُ جھلی ادارہ آئی ءَ دیمروئی سیاسی سما ءَ سرریچ بہ کن انت –

اگاں ما گل ءُ زرمبشت ءِ دیمروئی ءَ لوٹ ایں ءُ وت ءَ چہ سیاسی پدکنزی ءَ پھریزگ لوٹ ایں، گڑا اے وھد ءَ مارا وتی دلگوش ھمے جاہ ءَ دیگی انت- اے ٹک ءَ انکار کنگی نہ انت – اے وھد ءَ مئے گور ءَ سیاسی سما ءَ سر ریچیں گلے ھم ھست کہ ھستیں وھد ءَ مھکم انت ھم بلے وت ءَ ھست بوگ ءَ سرجمی ءَ دلجم بوگ یا وش پھمی ءِ آماچ بوگ وت ءَ وت جمود ءِ شکار کنگ ءِ وڑ انت – مارا ھچ وڑ ءَ دیمروئی ءُ دیم ءِ رؤگ ءِ سپر دارگی نہ انت ءُ ایشی ءِ ھاتر ءَ مارا یکشل ءَ کار کنگی انت، پگر ءُ ھیال ءُ جستجو وڑیں تخلیقی چاگردے ءِ دیمروئی دیگی انت –

آئی ءَ نبشتگ کہ مارا اے زانگی انت کہ بی وائی سی ءِ وڑیں گل وررود یا ھاسیں ایونٹ ئے پیداوار نہ انت بلکیں اے یکشلیں جھد، پگر ءُ سسا ءُ جستجو – پہ ما گل مدامی برز ءُ بالا بوتگ ءُ آئی ءَ مدامی برز ءُ بلند بوگی انت پرچا کہ ما ھما زوراکی نزام ءِ بگیری ءَ جھد کنگ ءَ ایں آئی ءَ یک مھکمیں گلے ءَ ابید دگہ ھچ وڑ ءَ پروش دیگ نہ بیت – ھمے ھاتر ءَ اے وھد ءَ مئے دلگوش یک مھکمیں گلے ءِ سر ءَ بوگ لوٹ ایت – مارا مدامی چہ چشیں چیزاں دور بوگی انت کہ آ گل ءِ یکجاھیں زور ءَ نزور کنت – مارا ھراب ءَ چہ ھرابتریں جاورھالاں ھم درگان درگان بوگی نہ انت – یکجاھ بوگ مئے لاچاری نہ انت بلکیں مئے تاکت انت- مارا ھر ھال ءَ مھکم بوگی انت مارا ھچ چشیں کارے کنگی نہ انت کہ چریشی ءَ گل ءُ مول سانمند بہ بنت – کسان ءَ چہ کسانتریِں پیسلہ زورگ ءَ مارا ھستیں وھدے جاورانی زانشت بوگی انت- مارا چہ چاگردی ترامجاھانانی وتسریں گپاں سانمند بوگی نہ ایں گل ءِ پیسلہ زورگی نہ انت –

آئی ءَ وتی کلوہ ءِ گڈسر ءَ نبشتگ کہ سوبمندی ھر ھال ءَ مئیگ انت، دلیری، پگری ءُ تمردی ءَ گوں اے جھد دیم ءَ برگی انت –