پاکستانی لشکر ءَ بلوچستان ءِ دمگ کیچ ءِ ھند دشت ءَ پشمبے ءِ روچ ءَ آپریشن ءِ وھد ءَ شش مردم دزگیر کتگ ءُ بیگواہ کتگ انت۔
دمگی اھوالانی رد ءَ گوستگیں روچ ءَ دشت ءِ دمگ درچکو ءَ فرنٹیئر کور ءُ انٹیلی جنس ایجنسی ءِ کارندھاں بازیں لوگانی سر ءَ چھاپہ جتگ۔ دمگی مردمانی گشگ اِنت کہ لشکر ءَ شش مردم چم بستگ اَنت ءُ گوں وت برتگ انت آیانی بارو ءَ ھچ وڑیں ھال ءُ اھوال نیست انت۔
بیگواھیں مردمانی تہ ءَ تاں انوگ ءَ چار مردمانی پجار لھداد ء برکت، وسیم ء بشیر، ایاز ء اھمد ءُ شکیل ء فقیر ناماں زانگ بوتگ اَنت وھدے کہ دو مردمانی پجار نہ بوتگ انت۔
زوراکی ءَ بیگواہ کنگ بلوچستان ءَ یک دیریں جیڑھے، ءُ گوستگیں روچاں ایشی ءِ تہ ءَ مزنیں گیشی یے گندگ بوتگ۔ دومی نیمگ ءَ بلوچستان ءَ پاکستانی لشکر ءِ دست ءَ بیگواہ بوتگیں ورنا ءِ دزگیری ءِ وھد ءَ اے ھپتگ ءَ گیر آمیدگسی بندی ءِ وئیل دیم ءَ اتکگ اَنت۔