ڈاکٹر ماھرنگ ءِ کیس ءَ آمیدگس سرکار ءِ دیم ءَ چہ وتی کانودی ءُ رھبندی واکاں دزکش بوتگ – بی وائی سی

بلوچ یکجھتی کمیٹی ءِ رھشوناں شال ءِ پریس کلب ءَ گوں اھوالکاراں تران کنان ءَ گوشتگ کہ مروچی ما شمے گور ءَ ڈاکٹر ماھرنگ بلوچ ءُ ایندگہ بندیگیں سنگتانی کیس ءِ درگت ءَ گپ جنگ ءَ اتکگ ایں – اے پریس کانفرنس ءِ مول اے کیس ءِ پژدر، بلوچستان ءَ آمیدگسی نزام ءِ سرا زور دیگے سان، ءُ بلوچ سیاسی بندیگانی بگیری ءَ درکانودی ارزیانی درگت ءَ گپ جنگ انت –

آیاں گوشتگ کہ ڈاکٹر ماھرنگ بلوچ بیست ءُ دو مارچ ءَ چہ شال سریاب دگ ءَ ھما وھد ءَ دزگیر کنگ بوتگ وھدیکہ پوج ءِ زوراکیں کریک ڈاؤن ءَ نمیران بوتگیں ورنایانی جونانی ھمراھی ءَ نندانک ءَ نشتگ بوتگ – پولیس ءَ نندانک سرا بیڑ برتگ ءُ اودا ورنایانی جون ءُ آیانی کھول ءِ دزگیر کنگے ھمرائی ءَ ڈاکٹر ماھرنگ بلوچ، بیبو بلوچ ءُ دگہ دو زالبول دزگیر کتگ انت –

آیاں گوشتگ کہ دزگیری ءَ پیش ھچ وڈیں سوب درشان کنگ نہ بوتگ بلے دومی روچ ءَ دمگی واکداراں رسانکدر ءَ گپ جتگ ءُ گوشتگ کہ ڈاکٹر ماھرنگ بلوچ سیکشن 3ایم پی او ءِ رِد ءَ دزگیر کنگ بوتگ –

آیاں گوشتگ کہ ما اے گپ ءَ پدر کنگ لوٹ ایں کہ تھری ایم پی او یک کانودی کرتن یے کہ دوھزار یازدہ ایکٹ ءِ رِدا کنگ بیت اے ایکٹ ءِ رِد ءَ ڈپٹی کمشنر ھما مردم ءَ سرپد کنت کہ تئی سرا اے الزام ھست ایں ءُ اگاں ھما نوٹس مردم ءَ سر مہ بیت گڈا رسانک ءَ کلوہ ءِ شنگ کنت ءپ چریشی ءَ پس سرکار وتی الزامانی گواھاں کار ایت ءُ ھما مردم ءَ وتی گپ جنگ ءِ ھم موہ دیگ بیت – اگاں الزام آئی ءِ سرا راست بوتاں گڈا پدا دزگیر کنگ بیت ءُ آ کیس ھوم ڈیپارٹمنٹ دست ءَ بیت-

آیاں گوشتگ کہ بلے ڈاکٹر ماھرنگ بلوچ ءِ کیس ءَ دفعہ 3 ءُ 6 ءِ رِد ءَ کانودی کنگ نہ بوتگ بزاں ایم پی او ایکٹ دوھزار یازدھے سرجمی ءَ رندگیری کنگ نہ بوتگ ھمے سوب ءَ مئے لوٹ بوتگ کہ ڈی سی ءِ شنگ کتگیِ نوٹیفیکیشن در کانودی ءِ گوشگ بہ بیت ءُ ھلاس کنگ بہ بیت –

اے درگت ءَ ما بلوچستان ھائی کورٹ ءَ ھم شتگ ایں ءُ مئے وکیلاں آمیدگس ءِ دیم ءَ درسیں کیس زاھر کتگ کہ اودا ھمے امیت کنگ بوتگ کہ آمیدگس وتی کانودی ءُ رھبندی تقاضہ ءَ پورا کنت ءُ کیس ءِ پیسلہ ءَ دنت بلے بژن آمیدگس سرکار ءِ دیم ءَ چہ وتی واکاں دزکش ایں –

آیاں گوشتگ کہ سَے روچ ءِ ڈاکٹر ماھرنگءِ کیس پیسلہ کنگ نہ بیت – پنچ شمبے ءِ روچ ءَ درسیں دلیل سرجم بوتگ انت آدینگ ءِ روچ ءَ پیسلہ بوگی بوتگ بلے ریاست ءَ اشی ءِ سرا زورگ داتگ ءُ پیسلہ کنگ نہ بوتگ – ھمے وڈ دوشمبے ءَ ھم پیسلہ کنگ نہ بوتگ اشی ءَ ابید ھم آمیدگس ءَ اے کیس ھوم ڈپارٹمنٹ ءَ دیم داتگ –

ھیرانی گپ ءِ کہ کانودی کار سرجم نہ کتگ انت ءُ آمیدگس ءِ بدل ءَ کیس واکدارانی دست داتگ – اگاں امیدگس ءَ مئے بگیری ءَ کیس ءِ پیسلہ بہ دات ایں گڈا مئے گور ءَ سپریم کورٹ ءَ روگ ءِ راہ ھست ات بلے اے پیسلہ ءَ پد سپریم کورٹ ما ھنی ھم شت نہ کن ایں – ھوم ڈیپارٹمنٹ نیمگ ءَ جوڈ کنگ بوتگیں کمیٹی کہ آئی ءِ تہ ءَ بیوروکریٹس ھست انت ھما اے کیس ءِ پیسلہ ءَ کن انت – اے کمیٹی ءِ پیسلہ کنگ ءَ ھچ وڈیں وھد نیست آ یک روچے زرت کناں یا یک سال ئے – اگاں کمیٹی مئے بگیری ءَ پیسلہ بہ دنت گڈا مارا پدا دوبر ھائی کورٹ روگ کپ ایت ءُ پدا سپریم کورٹ ءَ اے راہ پہ زور ھنچوش کنگ بوتگ کہ اشی ءِ مول بس وھد گوازینگ ءُ انساپ نہ کنگ –

اھوالکاراں گوں تران کنان ءَ آیاں گوشتگ کہ اے کیس ءَ ڈاکٹر ماھرنگ بلوچ ءَ ھوار بی وائی سی ءِ ایندگہ رھشونانی کیس ھم ھوار کنگ بوتگ انت ءُ اے اشی ءِ پیسلہ درسیں کیسانی سرا انت اشی ءَ چہ ھمے پدر بیت کہ پہ زور ھمے وڈ کنگ بوگ ءَ انت کہ دیر بگوز ایت – ما چہ آمیدگس، وکیل ءُ انسانی ھکانی ادارھاں گوں لوٹ کن ایں کہ اے کیس ءَ انساپ کنگ ءَ وتی کرد ءَ پیلو بہ کن انت – اشی ءَ ابید اے درکانودی کرتن ءِ بگیری ءَ بی وائی سی زوت دیمتری کارانی کنگ ءِ جار ءَ جنت –