بلوچستان ءِ دو مزنیں شھدگانی بند بوھگ ءَ گوستگیں 10 روچاں چہ لس مھلوک، سوداگر، ءُ ٹرانسپورٹرانی مشکلات گیش بوتگ انت۔ ٹرانسپورٹر ءُ کاروباری برادری ءَ ھر روچ لکاں کلدار ءِ تاوان بوگ ءَ انت۔
کوئٹہ چیمبر آف کامرس ءِ صدر محمد ایوب مریانی ءِ گشگ انت کہ شھدگانی بند بوھگ ءِ سبب ءَ تاجراں ایوک ءَ کنٹینر ءِ ھاتر ءَ ڈیمریج چارجز ءِ تہ ءَ روچے یک لکھ 20ہزار امریکی ڈالر (کساس 33.6ملین کلدار) ءِ تاوان برداشت کنگ ءَ انت وھدے کہ ایشی ءَ چہ گیش دگہ مالی تاوان انت۔
بلوچستان نیشنل پارٹی ءَ ڈاکٹر ماہ رنگ بلوچ ءُ بلوچ یکجھتی کمیٹی ءِ ایندگہ زالبولیں سروکانی دزگیر کنگ ءِ ھاترا 28 مارچ ءَ چہ وڈھ ءَ تاں کوئٹہ ءَ لانگ مارچے بندات کتگ ات بلے سرکار ءَ زھرشانی کنوکاں کوئٹہ ءِ تہ ءَ روگ ءَ چہ مکن کتگ ات انت۔
بی این پی ءَ مستونگ ءِ لکپاس ءَ دو مزنیں شھدگانی سر ءَ نندانک داتگ۔ سرکار ءَ لانگ مارچ ءِ بھر زوروک دیم ءَ روگ ءَ چہ رکّینگ ءِ ھاترا کنٹینر ایر کنگ ءُ کھڈ ءِ کشگ ءَ لکپاس ٹنل ھم بند اش کتگ۔
زھرشانی ءِ دھرنا ءُ سرکاری اڑاندانی سبب ءَ 28 مارچ ءِ شپ ءَ چہ دو مزنیں شھدگ بند کنگ بوتگ اَنت کہ ایشانی تہ ءَ این 40 شھدگ پاکستان ءَ گوں ایران ءَ ءُ این 25 شھدگ کوئٹہ ءَ گوں پاکستان ءِ مستریں ءُ کاروباری شھر کراچی ءَ ھمگرنچ کنگ بیت۔
کوئٹہ چیمبر آف کامرس ءِ صدر ایوب مریانی ءَ گوشت کہ این 40 شھدگ ءِ بند کنگ ءِ سبب ءَ 847 بوزر ءَ ھوار 1200 ءَ چہ گیش مال برداریں گاڑی ایران ءِ سیمسر ءَ اوشتاتگ انت کہ ایل پی جی ءُ پٹرولیم ءِ چیز پاکستان ءَ برگ ءَ انت۔ ھر گاڑی ءِ سر ءَ روچے 100 ڈالر ءِ نزیک ءَ کنٹینر ڈیمریج ءِ چارج جنگ بوھگ ءَ انت۔
آئی ءَ گوشت کہ کوئٹہ ءِ این ایل سی ڈرائی پورٹ ءَ ایران ءِ نیمگ ءَ روگ ءَ آلو ءُ برنج ءِ باریں 200 گاڑی ھم اوشتاتگ اَنت ءُُ آھانی تہ ءَ سامان زوت ھراب بوھگ ءِ نزیک ءَ اَنت۔ اے چیزانی دمگی بازار ءَ بھا کنگ ھم ممکن نہ اِنت پرچا کہ ادا چہ لوٹ ءُ گزر ءِ نہ بوھگ ءَ ریٹ سک کم اَنت۔
بلوچستان ءِ مستریں ٹرانسپورٹ کمپنی ءِ واھند حاجی مظفر علی لھڑی ءِ گشگ انت کہ ناامنی ءُ راہ بندی ءِ سوب ءَ ٹرانسپورٹ پڑ سکیں بھران ءِ تہ ءَ انت۔
آئی ءِ گشگ ءِ رد ءَ “مئے کاروبار گوستگیں سئے ماہ ءَ چہ متاثر بوتگ ءُ گوستگیں 10 روچاں سرجم ءَ بند اِنت۔” ‘
حاجی مظفر علی لھڑی ءَ گوشت کہ مستونگ ءَ چہ گوزوکیں راہ کوئٹہ ءَ گوں کراچی ءَ ہمگرنچ کنوکیں راہ کسان تریں ءُُ مستریں راہ انت۔ مئے روچ ءَ چہ اد ءَ 12 ءَ بگر داں 15 گاڑی رؤگ ءَ انت بلے نوں ایوک ءَ دو ءُُ سئے گاڑی چہ سبی، جیکب آباد، سکھر ءُُ اندری سندھ ءَ گوزوکیں متبادل راہ ءَ روگ ءَ انت کہ اے راہ دراج ءُُ گران انت۔ اے راہ ءَ 200 لیٹر گیشیں ڈیزل کارمرز بیت ءُ کرایہ ءَ ھم نزیک ءَ دو ھزار کلدار گیش بوتگ پمیشکا مسافر اے راہ ءَ روگ ءَ چہ رکّگ ءَ اَنت۔