تربت: بی وائی سی ءِ رھشونانی دزگیری ءِ ھلاپ ءَ زھرشانی

بلوچ یکجھتی کمیٹی کیچ ءِ چیردستی ءَ ڈاکٹر ماہ رنگ بلوچ،سبگت اللہ شاجی، بیبگر بلوچ ءُ دگرانی دزگیری ءِ ھلاپ ءَ زھرشانی روانکے برجم دارگ بیتگ-

بلوچ یکجھتی کمیٹی ءِ بنجاھی جار ءِ پد ءَ عیدالفطر ءِ دومی روچ ءَ تربت ءَ بلوچ یکجھتی کمیٹی ءِ نیمگ ءَ شھید فدا چوک ءَ زھرشانی روانکے کشگ بیتگ کہ شھر ءِ جتا جتائیں جاھاں تران ءُ دوبر شھید فدا چوک ءَ سر بیتگ ءُ مُچی ءِ دروشم ءَ بیتگ-

روانک ءِ مردمانی دستاں بینر ءُ پلے کارڈز بیتگ انت کہ آیانی سر ءَ بلوچستان ءَ برجاھیں انسانی ھکانی لگتمالی ءُ دزگیر بیتگیں رھشون ڈاکٹر ماہ رنگ بلوچ، سبگت اللہ ، بیبو بلوچ ءُ دگرانی دزگیریانی ھلاپ ءَ نبشتگ درج بیتگ انت-

روانک ءِ گڈسر ءَ یک مُچی ءِ بیتگ کہ بی وائی سی ءِ رھشوناں ھوار عصا ظفر، تربت سول سوسائٹی ءِ کنوینر گلزار دوست، آل پارٹیز کیچ ءِ کنوینر نواب شمبیزئی، منظور بلوچ ءُ دگراں تران کتگ-

تران کنوکاں گوشتگ ڈاکٹر ماہ رنگ بلوچ ءِ جد ءُ جھد یک امن، آئینی ءُ جمھوری جد ءُ جھدے ءُ گل ءِ دگہ رھشون گپتگ ءُ آیانی گون ءَ انسانی سلوک کنگ نہ بیگ ءَ انت ھاں آئین بس اُستان ءِ واستا انت دگرانی واستا گیر انسانی سلوک انت ءُ آیانی گون ءَ جتا جتائیں دروشمانی ازیتانی دیمپانی انت-

تران کنوکاں گوشتگ بلوچستان ءِ مڈیاں لٹ ءُ پلگ ءَ انت آپریشنانی درچ ءَ نسل کشی ءَ کنگ ءَ انت ھک ءُ روزگار ءَ لگت جنگ ءَ انت زندگی ءَ تنگ کنگ ءَ انت ءُ بلوچ رھشوناں آئینی ھک ءِ جد ءُ جھد ءَ دزکش کنگ ءَ انت سرپراز ءُ دگہ پارلیمانی باسک دیم ءَ کتگ ءُ کارمرد کنگ ءُ بلوچ کُش پالیسیانی بھر انت-

تران کنوکاں ڈاکٹر ماہ رنگ، بیبو بلوچ، شاجی ،بیبگر ءُ ڈاکٹر ھمل ءَ ھوار بی وائی سی ءِ دگہ باسکانی یل کنگ ءِ ھواری ءَ گیر انسانی سلوک ءِ بند کنگ ءِ لوٹ کتگ-

روانک ءَ مردین ءُ زالبولاں ھوار جتا جتائیں تکانی مھلوک ءَ بازیں کچے ءَ بھر زرتگ-