وتی پروا نیست انت ڈاکٹر ماہ رنگ ءِ زندگی ءِ واستا ترس انت- ماہ رنگ بلوچ ءِ ھواری ءَ بندیگیں بیبو بلوچ

چہ شال ءَ سیادی داروکیں نیشنل پاٹی ءِ کلانیں رھشون غفار بلوچ ءِ رد ءَ مروچی من ءُ بیبو ءِ مات مریم بلوچ ءَ بیبو بلوچ ءِ چارگ ءَ ھدہ جیل ءَ شتگ انت گڑا بیبو ءَ گوشتگ من ءَ وتی سھت ءِ بارو ءَ ھچ پروا نیست انت بلے من ءَ وتی لیڈر ڈاکٹر ماہ رنگ بلوچ ءِ زند ءِ واستا سک ترس انت-

غفار بلوچ ءِ رد ءَ بیبو ءَ آیاں گوشتگ ڈاکٹر ماہ رنگ بلوچ سک بیمار انت آ جتا جتائیں رنگاں ترسینگ بوگ ءَ سنت – پرز شناس ءُ کانون پسندیں جیل ءِ کارندہ مٹ بوگ ءَ انت – مشکوکیں کارندہ ڈیوٹی ءَ آرگ بوگ ءَ انت ءُ کمرہ ءَ ڈن کیمرہ جنگ بیتگ انت – چیریں کیمرھاں مانیٹرنگ ءُ مشکوکیں مردم آرگ بیتگ انت – وردنی مٹ بوگ ءِ جھد ءَ انت مشکوکیں مردمانی سُر ءُ پراں ڈاکٹر ماہ رنگ ءِ زندگی ءِ واستا سک ترس انت-

بیبو بلوچ ءَ دراھیں انسان دوست، راجدوست، وتن دوستین مھلوک ءُ انسانی ھکانی گلاں گوں دزبندی کتگ کہ آ ڈاکٹر ماہ رنگ بلوچ ءِ زندگی ءَ بہ پھریز انت ءُ باسکانی یل کنگ ءَ کرد ءَ پیلو بہ کن اَنت-