کراچی : یل بیگ ءَ پد سمی دین دوبر پولیس ءَ دزگیر کتگ

کراچی ءَ بلوچ یکجھتی کمیٹی ءِ راھشون سمی دین بلوچ پولیس ءَ ایم پی او ءِ آمیدگس ءَ چہ دوبر دزگیر کتگ-

سمی دین بلوچ ایم پی او آرڈر ءَ چہ سی روچ واستا بندیگجاہ ءَ برتگ-

سندھ ھکومت ءَ وتی پرمان نام ءَ نشبتہ کتگ کہ سمی بلوچ ھوار پنچ مردم دزگیر کتگ اَنت پرچاکہ آ مردماں باپرینگ ءَ بیتگ ھمے سبب ءَ ایمنی ھترہ بیتگ-

زانگ بہ بیت دوشمبے ءِ روچ ءَ بلوچ یکجھتی کمیٹی ءُ سول سوسائٹی کراچی ءِ باسکاں ڈاکٹر ماہ رنگ بلوچ، بیبرگ بلوچ ءُ دگہ کارکنانی آوار جنی ءِ ھلاپ ءَ پریس کلب ءِ ڈن ءَ زھرشانی ءِ جار جتگ اَت اود ءَ سمی بلوچ ءُ دگہ زھرشانی کنوک دزگیر کتگ اَنت-

سے شمبے سُھب ءَ پولیس ءَ سمی دین ءَ ھوار پنچ مردم سینٹرل جیل ءَ جوڈیشل مجسٹریٹ ءِ آمیدگس ءَ پیش کتگ-

آمیدگس ءَ وکیل گپ گوشدارگ ءَ پد سمی دین ءُ وھاب بلوچ ءَ ھوار پنچ مردمانی یل کنگ پرمان داتگ –

بلے آئی ءِ یل بیگ پد زوت پولیس ءَ سمی دین دوبر دزگیر کتگ ءُ گْوشتگ کہ اے ایم پی او ءِ رِد ءَ دزگیر کتگ-