شال : پروفیسر نوشین قمبرانی لوگ ءِ سر ءَ شپ ءِ وھد ءَ سی ٹی ڈی ءَ بیڑبرتگ

بلوچستان ءِ بُنجاھی شھر شال ءَ شپ وھد ءَ پاکستانی پوج ءَ نامی ئیں گُشندہ ءُ شائر پروفیسر نوشین قمبرانی لوگ ءِ سر ءَ بیڑبرتگ، لوگ ءَ ساڑی ئیں مردم تُرسینتگ اَنت، وئیل ءَ پد سیاسی پارٹیانی نیمگ ءَ ایر جنگ بیتگ-

شال ءَ اسپینی دگ ءَ کلی ترخام ءَ برجاہ فروفیسر نوشین قمبرانی ءِ لوگ ءِ سر ءَ شپ ءِ وھد ءَ پاکستانی چیریں ادارہ ءُ سی ٹی ڈی ءَ بیڑبرتگ بلے پروفیسر نوشین قمبرانی اود ءَ ساڑی نہ بیتگ-

کھول ءِ گوشگ اِنت کہ پاکستانی پوج ءَ بلوچ دودمان ءِ لگتمال کنان ءَ اود ءَ ساڑی ئیں کھول تُرسینتگ-

نوشین قمبرانی ءِ گْھار افشین قمبرانی ءَ چاگردی رسانکدر ءَ چہ گْوشتگ کہ شپ ساھت دو ءِ وھد ءَ پاکستانی پوج ءِ ادارہ ءُ پورسز کارندھاں چہ دیوال ءَ دور کتگ پروفیسر نوشین ءِ کمرہ پٹ ءُ پول کتگ ءُ لوگ مردم تُرسینتگ اَنت-

زانگ بہ بیت کہ نوشین قمبرانی وتی برات ءُ سیاداں ھوار دگہ بلوچ ورنایانی زورانسری آوار جنی ءِ ھلاپ ءَ پُرکار بیتگ ءُ وت یک سیاسی چاگردی کارکن بیگ ءِ ھمراھی ءَ براھوئی زبان ءِ گُشندھے ھم-

گوستگیں روچاں نوشین قمبرانی ءِ دو برات ناصر قمبرانی ءُ عبدالرحمان قمبرانی جتاجتائیں وھداں آیانی لوگ ءَ چہ زورانسری آوار جتگ اَنت وھدے کہ قمبرانی ءِ کھول ءَ چہ اے وھد ءَ ھشت مردم زورانسری بیگواہ کنگ بیتگ اَنت-

زورانسری آوار جنی ءِ وئیل ءِ ھلاپ ءَ کھول پریس کانفرنس کنان ءَ گْوشتگ کہ ناصر قمبرانی ءُ دگہ اگاں بیست چار کلاکانی تہ ءَ یل کنگ نہ بیت اَنت گُڑا زھرشانی ءِ راہ ءَ گچین کن ایں-

بلوچستان ءَ گوستگیں چیزے روچانی میان ءَ زورانسری آوار جنیانی وئیل ءِ تہ ءَ گیشی گندگ اَتکگ اود ءَ شال ءَ بلوچ یکجھتی کمیٹی ءِ بُنجاھی راھشون بیبرگ بلوچ ءُ برات حمل بلوچ زورانسری بیگواہ کنگ بیتگ اَنت-

ھمے وڑ شپ وھد ءَ بولان میڈیکل کالج ءِ وائس پرنسپل ءُ ماھر نفسیات ڈاکٹر الیاس بلوچ ءِ زورانسری آوار جنی ءَ پد آیانی دزگیری پدر کتگ ءُ جیل ءَ برتگ اَنت-

ھمے وڑ زورانسری آوار جنی ءَ اسرمند سعیدہ بلوچ آوار جتگ ءُ جیل ءَ برتگ-

بلوچ یکجھتی کمیٹی ءِ رِد ےَ بید دگہ کانونی کاروائی ءَ مردماں جیل ءَ چہ ریمانڈ دیگ بیگ ءَ اِنت- وئیل ھلاپ ءَ مروچی بلوچ یکجھتی کمیٹی ءَ شال ءَ زھرشانی نندانک کال داتگ-