چاگی : سلاہ بندیں مردمانی دست ءَ سلاھانی پچگرگ ءِ پژدر ءَ چار لیویز کارندہ در کنگ بیتگ اَنت

ڈائریکٹر جنرل لیویز فورس بلوچستان عبدالغفار مگسی ءَ چاگی ءَ سلاہ بندیں مردمانی دست ءَ سرکاری سلاھانی پچگرگ ءِ سبب ءَ چار لیویز کارندہ چہ کار کشگ بیتگ اَنت-

اِھوالکار رِد ءَ چاگی لیویز ءِ چار کارندھاں چہ گوستگیں روچاں یک اُرشے ءَ سلاہ بنداں سلاہ بچگپتگ اَنت چریشی ءَ پد ڈی جی بلوچستان لیویز ءَ چاریں کارندہ چہ کار ءَ کش اِتگ اَنت-

لیویز واکدار گوشگ اِنت لاپرواھی ءَ کارندھاں کڈنی کانونی دوھزار پانزدہ رِد ءَ تُرندیں کاروائی دیمپانی کنگ لوٹ اِیت-

زانگ بہ بیت کہ انّیگیں روچاں ڈائریکٹر جنرل بلوچستان لیویز فورس ءِ کارندھاں کڈن کتگ کہ آ چوکیانی سر ءَ اُرش کنوک ءُ سلاہ بروکیں سلاہ بندیں گلاں دیم پہ دیمی بہ کن اَنت، اگاں ناں ھما کارندھاں سلاہ بندیں مردماں وتی سلاہ داتگ اَنت آ چار کار کشگ بنت-

تنی وھدے بلوچستان ءِ جتاجتائیں دمگاں بازیں لیویز کارندہ اے وڑیں وئیلاں چہ کاراں کشگ بیتگ اَنت-

اے گپ ھم کابل چارگ اِنت کہ انّگیں روچاں بلوچستان ءِ جتاجتائیں دمگاں لیویز چوکیانی سر ءَ بیڑبرگ ءُ سرکاری سامانانی دستیگ کنگ وئیل ءِ گیشی بیگ ءَ اِنت- اشی ءَ ساری زھری ءَ ھوار دگہ دمگاں لیویز تھانانی سر ءَ دستیگ ءَ پد واکدار ءَ بازیں کارندھے چہ کار ءَ کش اِتگ اَنت-

اے وئیلانی زمہ واری گیشتر بلوچ آجوئی لوٹوکیں سلاہ بندیں گلاں زرتگ اَنت بلے اے گلانی گوشگ اِنت آ کارندھانی بلوچ بیگ ھاتر ءَ جانی تاوان ندے ایں-