نال : شاہ جان کرد ءِ کوش ءُ زاھد بلوچ ءِ زورانسری آوار جنی ءَ یازدہ سال سرجم بیگ ءَ مزنیں کچے ءَ مردمانی زھرشانی

سے شمبے ءِ روچ ءَ بلوچ یکجھتی کمیٹی جھالاوان ریجن نیمگ ءَ چہ نال ءَ شاہ جان بلوچ ءِ کوش، ناصر کریم بلوچ سر ءَ تیرگواری، ءُ بی ایس او ءِ گوستگیں چیئرمین زاھد بلوچ ءِ زورانسری آوار جنی ءَ یازدہ سال سرجم بیگ ءِ ھلاپ ءَ زھرشانی کنگ بیتگ چریشی ءَ ھزرانی کچ ءَ زالبول، کماش ءُ ورنا بھر بیتگ اَنت- نال ءِ مھلوک ءَ ریاستی زوراکی ءِ ھلاپ ءَ گم ءُ زھری درشان کنان ءَ شاہ جان کرد ءِ کوش بلوچ چُکچینی ءِ دْرچ اِنت، ریاست ءِ رویشگ کابل برداش نہ اِنت-

راج ءِ مُچی ءَ تران کنان ءَ بلوچ یکجھتی کمیٹی ءِ سروک ڈاکٹر ماہ رنگ بلوچ ءَ گْوشتگ کہ زندگیں راجاں ھلاس کُت نہ کن اِت ،مروچی مئے سرڈگار درندھانی دست ءَ اِنت ءُ بلوچ پُسگاں بے دردی ءَ کُشگ ءَ اَنت-

آئی ءَ گْوشتگ کہ مئے مات سالانی سال ءَ چہ وتی بیگواھیں بچ ءِ ودار ءَ ارس ریچگ ءَ اَنت بلے آ دپ ءَ چہ یک اُپے ھم نہ کش اِیت، اے درد ءُ بزگی مئے مردم اوپار کنگ ءَ اَنت، بلوچ ءِ جُھد انساپ ھاتر ءَ-

آئی ءَ گْوشتگ کہ ما کسے ءِ سرڈگار ءِ سر ءَ زورگر نہ ایں کہ ڈن ءَ چہ کاینت مئے ماتاں چہ آیانی بچّاں پچّگر اَنت من اے زوراکی ءِ ھلاپ ءَ آئی ءَ گْوشتگ کہ چیئرمین زاھد یازدہ سالاں چہ بلوچ بیگ ءَ سزا ورگ ءَ اِنت، بلوچ راج سر ءَ ریاستی زوراکی ءِ دیم پہ دیمی ءَ مارا یکجاہ بیگی اِنت- مروچی ھزارانی بلوچ زالبول نیم جنوزامے زند گوازینگ ءَ اَنت – گلامی زند دردناک اِنت مروچی ڈن ءَ چہ کسے کئیت مئے مردماں مات ءُ گوھارانی دیم ءَ جنت ءُ روت- ءُ پد ءَ اے زوراکی ءِ ھلاپ ءَ ترا گوشگ ءِ ھم ھک ندنت-

آئی ءَ گْوشتگ کہ ما اے ریاست ءَ چہ رھم اُمیت ءَ نہ کش ایں مروچی آ گوشگ اَنت کہ بلوچ ءِ لوگ لوگ ءَ لشکر کشی بکن، ریاست بلوچ راج ءَ ھلاس کنگ گیش ءُ گیواری ءَ کنگ ءَ اِنت – دانکہ بلوچ یکجاہ نہ بیت گلامی ءِ لانت ءِ ھلاپ ءَ جُھد نہ کنت ھمے وڑ جنگ بیت-