بلوچستان ءِ دو جتاجتائیں دمگاں شش مردم پاکستانی پوج ءِ دست ءَ بیگواہ کنگ بیتگ اَنت

بلوچستان ءِ تیابدپی شھر چہ گوادر ءُ بارکھان ءَ پاکستانی پوج ءَ شش مردم آوار جتگ ءُ بیگواہ کتگ اَنت-

گیشیں ھالانی رِد ءَ چہ پسنی ءَ لیویز کارمند قیس نثار بیگواہ بیتگ، سادھیں پوشکانی تہ ءِ کارمنداں آ چہ لوگ ءَ لَٹ ءُ کُٹ کتگ ناشناسیں جاھے ءَ برتگ-

لیویز کارمند قیس نثار ءِ مات ءَ گْوشتگ کہ آئی ءِ چُک قیس نثار شمبے ءِ شپ ءَ سادھیں پوشاکانی تہ ءِ مردماں چہ لوگ ءَ چست کتگ ءُ برتگ-

آئی ءَ گْوشتگ کہ منی چُک لیویز کارمندے یے آ ھچ درکانودی کاراں ھوار نہ اِنت ءُ آئی ءَ واکداراں چہ دزبندی کتگ کہ قیس نثار یل بہ کن اِت-

ھمے وڑ دگہ یک ورنایے کریم بخش ھم شپ وھد ءَ بیگواہ کنگ بیتگ- ِاِھوالکار رِد ءَ ورنا شپ وھد ءَ چہ لوگ ءَ آوار جنگ بیتگ-

دومی نیمگ بلوچستان ءِ دمگ بارکھان ءَ ھشت پروری دوھزار بیست پنچ ءِ روچ ساھت سے وھد ءَ ایف سی ءُ پولیس کارمنداں لوگانی سر ءَ بیڑبرتگ ءُ یکیں کھول ءِ چار مردم حاجی احمد بخش، عبداللہ جان ، محمد طاھر ءُ محمد اکبر آوار جتگ ءَ گوں وت برتگ اَنت-

زانگ بہ بیت اے کھول ءِ لھتے مردم گوستگیں روچاں ھم آوار جنگ ءُ بیگواہ کنگ بیتگ اِت اَنت-

یات بہ بہ اِت ھمے یکیں ماہ ءَ بلوچستان ءِ جتاجتائیں دمگاں تنی وھدے شست مردم ءَ گیش آوار جنگ ءُ بیگواہ کنگ بیتگ اَنت-