کیچ : سرکاری پلامرزی ٹولی ءِ تیرگواری ءَ، کسانی سالی ئیں ورنایے بیران

بلوچستان ءِ دمگ کیچ ءَ سلاہ بندیں مردمانی تیرگواری ءَ چہ ھپدہ سالی ئیں ورنایے بیران بیتگ-

بیران بیتگیں ورنا ئے پجّار معراج ء عبدالقادر نام ءَ چہ بیتگ- تیرگواری ءِ وئیل کیچ ءِ دمگ گومازی ءَ شنکن ءَ بیتگ-

تیرگواری ءِ وئیل ءَ آ ساری ٹپی بیتگ ءُ آئی ءَ نادُراھجاہ ءَ برگ ءَ بیتگ اَنت کہ نیم راہ ءَ بیران بیتگ-

دمگی اِھوالکار رِد ءَ کُشکارانی سیادی سرکاری پلامرزی سلاہ بندیں ٹولی بزانکہ ڈیتھ اسکواڈ ءَ اِنت-

زانگ بہ بیت کہ سرجمیں بلوچستان ءَ پاکستانی پوج ءِ نیمگ ءَ چہ سلاہ بندیں ٹولی جوڑ کتگ آ ڈیتھ اسکواڈ نام ءَ چہ زانگ بنت-

راجدوستیں پارٹیانی گوشگ اِنت کہ اے ٹولی مردمانی بیگواہ ءُ کُشگ ءَ اَبید جتاجتائیں چاگردی سِلّکاریاں تچکی ءَ ھوار اَنت وھدے کہ پاکستانی پوج ءُ چیریں ادارھاں آ سرجمی ءَ بے لگام کتگ اَنت-