تربت ءَ سیکنڈ ایئر ءِ ھپدہ سالی ئیں نودربر ءِ کامل شریف ءُ آیانی نزیکیں سیاد احسان سرور سے شمبے ءِ سُھب نُھ ءَ چہ بیگواہ ءَ اِنت- آیانی فون ھم سُھب ءَ چہ یکشل ءَ بند آیگ ءَ اَنت-
کامل شریف، ساچان وانگجاہ ءِ ڈائریکٹر ءُ پُرکاریں چاگردی مردم شریف ذاکر ءِ چُک اِنت وھدے کہ احسان سرور آئی ءِ نزیکی سیاد اِنت-
شریف ذاکر دوئیں ورنایانی بیگواہ بیگ گپ راست کتگ- آیانی رِد ءَ سے شمبے ءِ سُھب نُھ اے دوئیں ورنا ساچان وانگجاہ ءَ چہ پارک ھوٹل ءِ نزیک ءَ یک زروری ایں کار ءِ ھاتر ءَ شتگ اَنت بلے واتر نیتکگ اَنت ءُ ھما اِنت کہ آیانی پون یکشل ءَ بند اَنت-
شریف ذاکر ءَ گْوشتگ کہ آیاں دوئیں ورنایانی شوھازگ ءَ شر جُھد کتگ بلے آ ھچ وڑیں دز نہ کپتگ اَنت اشی ءَ پد آ پولیس اسٹیشن ءَ شتگ اَنت بیگواھی ارزبندی داتگ دانکہ پولیس آئی ءِ بیگواھی ءُ آوار جنوکاں بہ شوھاز اِیت-
زانگ بہ بیت کہ دو روچ ءَ ساری سنگانی سر ءَ شریف ذاکر ءِ لوگ سر ءَ دستی بمب چگل داتگ ءُ اشی ءَ پد تیرگواری ھم کتگ بلے اے وئیل ءَ پد ھچ وڑیِں دزگیری نہ بیتگ-