ڈالبندین مُچی : چد ءُ گیشتر جون چِست نہ کن ایں، ھر یک بیگواھیں مردمے سلامتی ءَ لوٹ ایت – ڈالبندین مُچی ءَ تران

بلوچ یکجھتی کمیٹی ءِ چیردستی ءَ چاگی ءِ دمگ ڈالبندین ءَ برجم دارگ بوتگیں راجی مُچی ءَ ھزارانی کچ ءَ مردماں بھر زرتگ –

شھرے کُنڈ ءَ ڈنو پٹ ءَ مروچی سھب ءِ ادار یازدہ ءَ بندات بوتگیں اے مُچی بیگاھے ادار پنچ ءَ آسر بوتگ –

ڈالبندین ءِ دمگی اھوالکارانی گوشگ انت کہ ڈالبندین ءَ چد ءُ پیسر انکس مزنیں مُچی کنگ نہ بوتگ کہ ایشی ءِ تہ ءَ اولی رند انت زھگ ءُ زالبولاں ھوار مزنیں کچے ءَ مھلوک ءَ بھر زرتگ –

اھوالکارانی رِد ءَ مچی ءَ بھر زورکیں مردمانی تہ ءَ گیشتریں کچ ورنایانی بوتگ کہ ڈالبندین ءُ چاگی، رکشان ڈویژن ءَ دگہ ھند ءُ دمگانی مھلوک اتکگ انت –

چاگی ءِ دمگ ڈالبندین ءَ بلوچ یکجھتی کمیٹی ءِ چیردستی ءَ برجم دارگ بوتگیں اے مُچی بلوچ چکچینی ءِ یاتگاری ءِ نام ءَ دارگ بوتگ –

اے مُچی ءَ بیگواھیں مردمانی سیاد ءُ وارساں ھم بھر زرتگ ءُ آیانی دست ءَ وتی دوستیگیں مردمانی اکس بوتگ انت –

راجی مُچی ءَ بلوچ یکجھتی کمیٹی ءِ سروک ڈاکٹر ماہ رنگ بلوچ، صبغت اللہ شاہ جی، وھاب بلوچ، سمی دین، ڈاکٹر صبیحہ بلوچ ءَ ھوار دگہ ترانکاراں تران کتگ-

ڈاکٹر ماہ رنگ بلوچ ءَ تران کنان ءَ گوشتگ کہ ریاست بلوچاں ھمے باور کنائینگ ءَ انت کہ ادے نندوکیں مردمانی ارزشت چوں رستر ءَ گنتر انت ءُ آیانی مرگ ءُ زند ریاست ءِ دست ءَ انت –

آئی ءَ گوشتگ کہ بلوچ چد ءُ گیشتر جون چست نہ کنت بلکیں نوں آیاں ھر یک بیگواھیں مردمے سلامتی ءَ لوٹ ایت ءُ ھمے وڑ وتی سرڈگار ءُ مڈی لوٹ انت – اے سرڈگار ءِ پھازگ ءِ ھاتر ءَ مئے کماشاں زوراکی ءِ دیمپانی کتگ بلے ایردستی نہ منّ اِتگ –

آئی ءَ گوشتگ کہ بلوچاں لوٹ ایت کہ وتی ھاموشی ءَ ھلاس بہ کن انت ءُ پاکستان ءَ ھوار سرجمیں جھان ءَ بہ گوش انت کہ آیاں چکچینی ھچ وڑ ءَ نہ لوٹ ایت –

آئی ءَ گوشتگ کہ سرجمیں جھان ءَ اے کلوہ ھم دیگ بہ بیت کہ ادا ھر مڈی ءِ کہ ھست انت آ بلوچانی ئیگ انت ءُ آیانی مرزی ءَ ابید ھچ وڑیں پریاماں نہ منّ ایں –

ایندگہ ترانکاراں گوشتگ کہ انسانی ھکانی لگتمالی ءَ ھوار بلوچستان ءَ مھلوک ءِ لٹ ءُ پل ھم برجاہ انت کہ آئی ءِ درور چاگی انت –

آیاں گوشتگ کہ ادا سُھر ءَ ھوار دگہ بازیں مادنے ھست بلے اد ءِ مردم انگت بے وس انت –

ترانکاراں گوشتگ کہ چاگی ءَ ایٹمی تجربگ ءِ سوب ءَ تباہکاری ءِ سان ءَ مھلوک سانمند بوگ ءَ انت بلے آیانی رکینگ ءِ ھچ وڑیں گامگیج زورگ بوگ ءَ نہ انت –

ترانکاراں چہ انسانی ھکانی گلاں گوں لوٹ کتگ کہ آ انسانی ھکانی لگتمالی ءِ بگیری ءَ نوٹس بہ زور انت –

اے مُچی ءَ پیش چاگی ءَ پنچ شمبے ءِ روچ ءَ انٹر نیٹ بند کنگ بوتگ انت وھدیکہ دمگی اھوالکارانی رِد ءَ مروچی سھب ءَ موبائیل ھم بند کنگ بوتگ انت اشی ءَ ابید پی ٹی سی ایل لینڈ لائن ھم بند کنگ بوتگ انت –