بلوچ یکجھتی کمیٹی ءِ راھشون ڈاکٹر ماہ رنگ بلوچ ءَ وتی یک توار بندیں کلوھے ءِ تہ ءَ گْوشتگ کہ شما درست سرپد اِت کہ بلوچ چُکچینی ءِ ھلاپ ءَ بیست پنچ جنوری ءَ یک راجی مُچی برجم دارگ بیگ ءَ اِنت- دالبندین سر بیگ ءَ، ما پولیس ءِ مزنیں کساسے کارمند ءِ ھمراھی ءَ فرنٹیئر کور ءِ کارمندانی ساڑی بیگ دیستگ – بلوچستان ءِ دگہ دمگاں چہ آؤکیں کارواناں راھاں دارگ ءَ اَنت دالبندین ءَ پُترگ ءَ مکن کنگ بیگ ءَ اَنت-
ڈاکٹر ماہ رنگ بلوچ ءَ گْوشتگ کہ گوستگیں شپ، پاکستانی پوج ءَ دالبندین ءَ لوگ لوگ ءَ پتانک بھر بانگ کتگ، جھمنندیاں بیست پنچ جنوری ءَ بیوکیں راجی مُچی ءَ بھر زیرگ ءَ چہ دارگ ھاتر ءَ بیھار دیگ بیگ ءَ اَنت- بدبھتی ءَ چہ دالبندین ءَ دمگی ءُ میان استمانی رسانکدری نیست اَنت- چاگردی رسانکدر، کہ مئے توار ءَ چست کنگ ءِ یکیں راہ اِنت، نو سرجمی ءَ بند کنگ بیتگ-
آیانی گْوشگ اِنت کہ مارا تُرس اِنت کہ ریاست کریک ڈاؤن ءَ چہ مئے پُرایمنیں مچی ءَ ایرموش کنگ ھاتر ءَ انٹرنیٹ ءِ بندی ءَ چہ پائدگ چست کنت – اے زوراکیں گامگیج ءَ اَبید من سرجمیں راج ءَ چہ دالبندین ءَ سر بیگ ءُ راجی مُچی ءَ یکجاہ بیگ دزبندی ءَ کن آں-
ڈاکٹر ماہ رنگ بلوچ ءَ گْوشتگ کہ ھما مردم دالبندین ءِ سپر کنگ ءَ چہ نزور اِنت، ما شمارا اے مول ءُ مراد ءِ پلامرزی ءِ ھاتر ءَ چاگردی رسانکدر سر ءَ وتی توار چست کنگ دلبڈی ءَ دیاں-