سے شمبے ءِ روچ ءَ بلوچ یکجھتی کمیٹی ءِ بُنجاھی راھشون ڈاکٹر صبیحہ بلوچ ءِ سروکی ءَ “دفاع بلوچ اقدار ” نام ءَ چہ دالبندین ءَ یک روانکے کشگ بیتگ، روانک جتاجتائیں ھنداں چہ روام قاسم خان ءِ فٹبال گراؤنڈ ءَ یک مزنیں مُچی ءِ دروشم ءَ بیتگ-
روانک ءَ زالبول، چُکاں ھوار کماشیں مردمانی ھم مزنیں کچے ءَ ساڑی بیتگ اَنت-
مُچی ءَ چہ ڈاکٹر صبیحہ بلوچ ءَ تران کنان ءَ گْوشتگ کہ مروچی دالبندین ءِ شرپمندیں راج ءَ مزنیں کچے ءَ بھر بہ زور اَنت اے پدر بہ کن اَنت کہ آ بیست پنچ جنوری ءَ مُچی ءِ واستا شریں وڑے ءَ جاڑیگ بہ بنت، بیست پنچ جنوری ءِ مُچی ءَ ھلاس کنگ ھاتر ءَ جتاجتائیں پندل سازی کنگ ءَ اَنت کراچی ءَ بلوچ یکجھتی کمیٹی ءِ راھشونانی دزگیری ءُ ایف آئی آر، گوستگیں روچ ءَ نوکنڈی ءَ بلوچ یکجھٹی کمیٹی ءِ نیمگ ءَ برجم دارگ دارگ بیتگیں مچی ءَ ھواریں مردمانی ھلاپ ءَ ایف آئی آر اشی ءِ بھر اِنت کہ بلوچ راج ءَ بیست پنچ جنوری ءِ مُچی ءَ چہ کجام وڑ ءَ دارگ بہ بیت بلے اے دُژمنیں توانمندانی ردی اِنت کہ نو آ بلوچاں پہ بیھار ءُ ایف آئی آر ءَ چہ بدار اِیت-
آئی ءَ گْوشتگ کہ بلوچستان ءِ مردم مروچی زُلم ھلاپ ءَ درتکگ اَنت، سیمسر ءِ دمگ ءِ مردمانی واستا کار ءُ روزگار ءِ در بند کتگ اَنت آیانی سر ءَ زلم کوہ پروشتگ، ھرچ وڑ مئے چُکچینی کنگ بیتگ بلے دُژمن اے گپ ءَ یات بہ کنت کہ اگاں بلوچستان بلوچ ءِ واستا دوازہ اِنت گُڑا ترا ھم پہ وشی ءَ نندگ ءَ نیل ایں-