مستونگ : بلوچ شھیداں سُھرچکیں دروت ءِ ندر کنگ ءِ ھاتر ءَ روانک ءُ مراگش برجم دارگ بیتگ

بلوچ یکجھتی کمیٹی مستونگ زون، چہ ساروان ریجن ءِ نیمگ ءَ شمبے یازدہ جنوری ءَ بلوچ شھیدانی ءُ درکانودی کُشگ بیتگیں مردمانی دیمونیاں سُھرچکیں دروت ندر کنگ ءِ ھاتر ءَ یک روانکے ءُ مراگشے برجم دارگ بیتگ-

روانک چہ بس اڈہ مستونگ ءَ بندات بیتگ کلی دتو ءِ کبرستان ءَ تاں سر بیتگ، اود ءَ بلوچ یکجھتی کمیٹی ءِ بُنجاھی راھشون ڈاکٹر ماہ رنگ بلوچ ، شاہ جی صبغت اللہ ، بیبرگ بلوچ ءُ دگراں سنگت ثناء ءَ ھوار بلوچ شھیدانی کبرانی سر ءَ بلوچی چادر پر داتگ اَنت، پُل شانی کتگ ءُ سواب ءِ ھاتر ءَ فاتحہ وانی کتگ-

اے درگت ءَ زالبولاں ھوار راج ءِ مزنیں کچے ءَ آیانی ھمراھی ءَ ساڑی بیتگ اَنت-

روانک ءَ چہ تران کنان ءَ ڈاکٹر ماہ رنگ بلوچ ءَ گْوشتگ کہ بلوچ راج شھیدانی دیمونیاں ھچبر بے ھیال کنگ نہ بنت انت-

آیاں جار جتگ کہ بیست ءُ پنچ جنوری ءَ دالبندین ءَ یک راجی مُچی یے برجم دارگ بیت، کہ آئی ءِ مول ءُ مُراد جھان ءَ کلوہ دیگی اِنت کہ بلوچ راجی چُکچینی اوپار کنگ نہ بیت-

ڈاکٹر ماہ رنگ بلوچ ءَ گْوشتگ کہ ما جھان ءَ اے باور کنائین ایں کہ ناں مئے راج بے وارس اِنت ءُ ناں مئے سرڈگار بے وارس اِنت اے بے وارسیں لاش ءُ کبر ھکیکت ءَ مئے بے بھائیں شھیدانی چیدگ اَنت- ما سرجمیں بلوچ راج ءَ چہ دزبندی کن آں کہ آ بیست ءُ پنچ جنوری ءَ دالبندین ءَ برجم بیوکیں راجی مچی ءَ جوانیں وڑے ءَ بھر بزیر اَنت ءُ پدر بہ کن اَنت ما وتی شھیدانی وارس ایں-

بلوچ یکجھتی کمیٹی ءِ راھشون ءَ راج ءَ را زور داتگ کہ آ شھیدانی لیکہ ءُ جُھد ءَ زندگ بہ کن اَنت ءُ زُلم ءُ نا انساپیانی ھلاپ ءَ مُچی گھگیری ءَ مھکم بہ کن اَنت-