ھزدار: بی ایل اے ءِ یکشلیں اُرش، واکدار جاورھالانی بارو ءَ تُک ءُ نُک

زھری ءَ بلوچ لبریشن آرمی ءِ یکشلیں اُرش، سرکاری جاھانی دستیگ کنگ ءُ مھلوک ءَ گوں تران کنگ بیتگ –

چار شمبے ءِ روچ ءَ چہ ھزدار ءِ شھر ءَ چِل کلو میٹر دور زھری شھر ءَ نیمروچ ءِ وھد ءَ پرپٹ ءُ گاڑیاں سواریں سَد ءَ گیچ سلاہ بندیں مردم شھر ءَ پترتگ انت ءُ بازیں سرکاری جاہ دستیگ کتگ انت – ھمے وھد ءَ سلاہ بنداں لیویز تھانہ، بلوچستان کانسٹیبلری ءِ بنجل، نادرا ءُ میونسپل کمیٹی ءِ کارگس ءِ سر ءَ اُرش کتگ ءُ اود ءَ جاڑیگیں لیویز ءُ بلوچستان کانسٹیبلری ءِ کارمندانی سلاہ ءُ دگہ سرکاری ساز ءُ سامان پچگپتگ انت- اُرش ءَ پد اے ماڑی ءُ سرکاری ریکارڈ مانداشتگ انت ءُ ھمے وھد ءَ سلاہ بند شھر ءُ تر ءُ تاب کنان ءَ مھلوک ءِ مُچی ءِ گون ءَ تران اش کتگ-

اُرش ءِ ھال ءِ سر بوگ ءَ دمگ ءَ آیوکیں پورسز ءِ کاروان بمب ءِ نشانگ کنگ ءَ پد سلاہ بندیں اُرش بیتگ انت- واکداراں یک کارمندے ءِ زدگ بوگ ءِ اھوال شنگ کتگ انت- بلے دمگی مردمانی رد ءَ پورسز ءِ کاروان ءِ سر ءَ تراک ءَ پد سلاہ بنداں سنگر گپتگ ءُ نشانگ کتگ-

شنگ بیتگیں تامر بنداں گندگ بیت اِنت مھلوک بازیں کچے ءَ سلاہ بنداں گوں مھروانی ءَ دُچار کپگ ءَ انت-

اُرش ءِ زمہ واری بلوچ لبریشن آرمی ءَ من اتگ ات – اُرش ءَ پد شھر ءُ کش ءُ گوراں ھیلی کاپٹر بال ءَ گندگ بیتگ بلے داں انگت بے گامگیج زیرگ ءَ واتر شتگ انت-

دومی نیمگ ءَ سرکار ءِ واکدار تُک ءُ نُک انت ءُ ھچ گپ دیم ءَ آرگ ءَ نہ اَنت-

زانگ بہ بیت بی ایل اے ءِ اُرش ھنچیں وھدے ءَ دیم ءَ اتکگ کہ یک ھپتگے ءَ پیش تربت ءَ بلوچ لبریشن آرمی ءِ مجید بریگیڈ ءِ یک ھترناکیں اُرشے ءَ پاکستانی پوج ءِ کاروان نشانگ کنگ بیتگ ات-