بلوچستان ءِ دمگ نوشکی ءَ پاکستانی پوج ءَ دو ورنا آوار جنگ ءَ پد بیگواہ کتگ انت-
گیشیں اھوالانی رد ءَ پاکستانی پوج ءَ شکیل ء عبدالطیف جھمنند قاضی آباد ءُ ریاض ء نیاز مھمد جھمنند قادر آباد گوستگیں روچ ءَ دزگیر کنگ ءُ ناشناسیں جاھاں برگ بیتگ اَنت چریشی ءَ پد ھردوک بیگواہ انت –
چم دیستگیں مردمانی رد ءَ پاکستانی پوج ءِ ھمراھی ءَ لس پوشاکی چیریں ادارھانی کارندہ ھم گون بیتگ اَنت-
بلوچستان ءِ دگہ جاھانی ڈول ءَ نوشکی ھم زورانسری بیگواھیانی آماچیں دمگاں زانگ بیت انت کہ اود ءَ بازیِں سالاں بازیں مردمے زورانسری بیگواھیانی آماچ انت-
دومی نیمگ ءَ کیچ ءَ دو جاھاں پوج ءِ دست ءَ کشگ بیتگیں ظریف اومر ءِ کھولبءَ نندانک داتگ ءُ ھمے وڑ ھوشاپ ءِ زیرو پوائنٹ ءَ سی پیک دگ ءِ سر ءَ زمان جان ءُ ابولھسن ءِ کھولانی نیمگ ءَ یک ھپتگے ءَ چہ دگ بند اِنت-