چہ تربت آپسر ءَ زورانسری بیگواھیں مردمانی پریس کانفرنس، دوستناکانی یل کنائینگ لوٹ

کھولاں گوشتگ کہ اگاں مئے دوستناک دیم ءَ آرگ نہ بیت اَنت گُڑا ما لاچار بہ ئے ایں نندانک دے ایں-

بلوچستان ءِ دمگ کیچ ءِ شھر چہ تربت آپسر ءَ سیادی داروکیں زورانسری آوار جنی ءِ نشانگ بیتگیں شش مردمانی کھولاں مروچی تربت پریس کلب ءَ پریس کانفرنس کنان ءَ گْوشتگ کہ وتی دوستناکانی اِھوال رسانکدر درشان کتگ ءُ آیانی یل کنگ ءِ لوٹ کتگ-

تربت پریس کلب ءَ اِھوالکاراں چہ تران کنان ءَ تربت آپسر ءَ سیادی داروکیں یک کھولے ءِ رِد ءَ دہ دسمبر ءَ پاکستانی پوج ءَ آیانی سے برات احسان منظور ، اتفاق افضل منظور ءُ حامد منظور آوار جتگ ءُ ناشناسیں جاھے ءَ برتگ اَنت چریشی ءَ پد منی سئیں برات بیگواہ اَنت-

پریس کانفرنس ءَ ساڑی ئیں یک زالبولے ءِ رِد ءَ آئی ءِ لوگ ءَ چہ سے مردم زورانسری آوار جنی ءِ نشانگ کنگ بیتگ اَنت آیانی تہ ءَ شمس الدین چار سال ءَ ساری چہ تربت ءَ پاکستانی پوج ءَ زورانسری آوار جنی ءِ نشانگ کتگ-

زالبول رِد ءَ ھمے ماہ ءَ آئی ءِ کھول ءِ دگہ دو مردم آیانی تہ ءَ شھاب ھژدہ روچ ءَ ساری پاکستانی پوج ءَ آئی ءِ لوگ ءَ چہ آوار جتگ ءُ بیگواہ کتگ وھدے کہ عبدالوھاب نامیں دگہ یک کھول ءِ یکین اِنت گوستگیں پنچ روچ ءَ چہ بیگواہ ءَ اِنت-

اے کھولانی گوشگ اِنت کہ دوستناکانی زورانسری آوار جنی ءَ چہ سرجمیں کھول سک دلسیاھی دیمپان اِنت-

پریس کانفرنس میان ءَ کھول ءَ گوشتگ کہ مئے دوستناکانی سر ءَ کجام وڑیں بھتامے ھست آیاں چُشیں گناھے کتگ یا کہ کجام وڑیں میارباری یے دست ءَ بیتگ اِنت گُڑا آیاں آمیدگس ءَ پیش بہ کن اِت سپائی ءِ موہ بدے اِنت دانکہ گمجتیں کھولاں درد ءُ رنجاں چہ بہ رکین اِت-

کھول ءَ دیمتر ءَ گْوشتگ کہ ما اے پریس کانفرنس ءَ چہ کیچ ءِ دمگی انتزامیہ ءُ واکدار ءَ کلوہ دیگ لوٹ ایں کہ اگاں آؤکیں دو روچ ءَ مئے دوستناک دیم ءَ آرگ نہ بیت اَنت یا کہ مارا آیانی درگت ءَ سرپدی ندات گُڑا لاچار بہ ئے ایں ما نندانک دے ایں-

آیاں گْوشتگ کہ مئے نندانک سی پیک ءَ ھوار دگہ ھاسیں جاھے ءَ ھم بیت کنت چریشی ءِ ما جار جن ایں آئی ءِ سرجمیں زمہ واری دمگی انتزامیہ ءُ واکدار سر ءَ بیت-