بلوچستان ءِ دمگ ھزدار ءَ دو مردمانی ھَڈ دزکپتگ اَنت-
ھَد ھشت سالاں بیگواھیں عابد حسین ء غلام حسین عمرانی ءُ مست خان ء گھور خان لوٹانی جھمنند نورگامہ ءِ ناماں زانگ بیتگ اَنت-
ھَد زھری گزان کوچو ءِ دگ ءَ دزکپتگ اَنت دزکپتگیں ھڈانی پجار پرچیانی سر ءَ نبشتگ بیتگ اَنت ءُ میت کھول ءِ ھوالگ ءَ کنگ بیتگ اَنت-
پابزدہ اگست دوھزار ءُ بیست ءُ یک ءَ شال ءَ ھستیں وائس فار بلوچ مسنگ پرسنز ءِ بنجل ءَ عابد حسین ءِ مات اتکگ ءُ آئی ءِ بیگواھی ءِ درگت ءَ اھوال داتگ اَنت-
کھول ءِ رد ءَ عابد حسین 28 اکتوبر 2017 ءَ ھزدار انجیرہ ءَ لھتے دھشتداریں مردمانی نائب ملا مرید ءَ آوار جتگ ءُ ریاستی ادارھانی ھوالگ ءَ داتگ-
کھول ءِ رد ءَ عابد حسین ءِ بیگواھی ءِ ھلاپ ءَ بازیں دَر ٹک اتگ اَنت بلے ھچ امیت ءِ پدراھی نہ بیتگ ءُ مروچی آیانی ھَڈ دزکپتگ اَنت-
زانگ بہ بیت روچ ءِ میان ءَ بلوچستان ءِ جتا جتائیں جاھاں چار بیگواھیں مردمانی لاش دزکپتگ اَنت – کہ ایشانی توک ءَ دو لاش آواران ءَ دزکپتگ اَنت-
چہ آواران ءَ دزکپتگیں لاشانی پجار فقیر جان ءُ عیسیٰ ءِ ناماں زانگ بیتگ اَنت کہ فقیر جان 26 ستمبر 2024 ءَ چہ لوگ ءَ آوار جنگ ءُ بیگواہ کنگ بیتگ ءُ عیسی 17 فروری 2023 ءَ بیگواہ کنگ بیتگ-