آواران : زورانسری بیگواہ دلجان بلوچ ءِ یل کنائینگ ءِ ھاتر ءَ زھرشانی

زورانسری بیگواہ دلجان بلوچ ءِ گھْار آواران ءِ ڈپٹی کمشنر ءِ کارگس ءِ دیم ءَ نہ کُٹوکیں شُدکشیں ھڑتال بندات کتگ، آیانی گوشگ اِنت بندیگیں دلجان ءِ یل کنگ ءِ لوٹ ءَ ابید دگہ ھچ گپ ءُ تران نہ بیت اِنت-

دلجان بلوچ دوازدہ جون دوھزار ءُ بیست ءُ چار ءَ پاکستانی پوج ءَ آ چہ لوگ ءَ آوار جتگ اَت کہ پد ءَ آئی ءِ ھچ وڑیں ھال نیست انت-

آئی ءِ یل کنائینگ ءِ ھاتر ءَ زھرشانی ھژدہ نومبر ءَ بندات بیتگ، موھدے کہ کھول ءِ مردم ءُ دمگی جھمننداں آواران ءِ بُنجاھی دگ زھرشانی کنان ءَ بند کتگ اَنت – بلے واکدارانی دلجمی دیگ ءَ پد دگ پچ کتگ اَنت اش، بلے ڈپٹی کمشنر ءِ کارگس ءِ دیم ءَ نندانک انگت ءَ برجاہ ءَ اِنت-

دلجان بلوچ ءِ گْھار ءَ زھرشانی بُنجل ءَ پریس کانفرنس ءِ میان ءَ شدکشیں ھڑتال ءِ جار جتگ ءُ دمگی رھشونانی سر ءَ کول ءِ پروشگ ءِ بھتام جتگ – آئی ءَ گوشتگ کہ ما سک ودار کتگ – اے شُدکُشیں ھڑتال گُڈی اُمیت اِنت-

زھرشانی کنوکاں دلجان بلوچ ءِ زوت یل کنائینگ ءُ زھرشانی ءِ میان ءَ زھرشانی کنوکانی ھلاپ ءَ نکش بیتگیں ایف آئی آرانی ھلاس کنگ ءِ لوٹ ءَ کنگ ءَ اَنت- کھول ءِ گوشگ اِنت کہ اگاں اے میان ءَ مارا تاوان دیگ بیتگ گُڑا اشی ءِ زمہ واری انتزامیہ ءِ سر ءَ بیت انت-

دومی نیمگ ءَ، ھکانی گل بلوچ وائس فار جسٹس ءَ دلجان بلوچ ءِ زورانسری آوار جنیانی ءُ آئی ءِ کھول گوں یکجاھی درشان ءِ ھاتر ءَ رسانکدر ءَ مھم ءِ برجم کنگ ءِ جار جتگ – اے مھم یکشمبے ءَ یک دستمبر ءِ شپ ءِ ھشت ءَ بگر داں دوازدہ ءَ تاں ایکس ءَ برجاہ بیت انت-

بی وی جے ءَ وتی درشان ءِ تہ ءَ گوشتگ کہ اے ایردستانی توار ءِ چست کنگ اِنت ءُ دلجان بلوچ آئی ءِ کھول ھاتر ءَ انساپ ءِ مھکم کنگ جُھد اِنت-

بی وی جے ءَ زھرشانی ءِ میان ءَ کھول ءِ تُرسینگ ءُ نشانگ کنگ ایر جتگ انت – آئی ءَ گْوشتگ کہ ” اے مھم زورانسری آوار جنی ءِ سابمندانی نگیگیں جاوراں چہ راجی زانت ءَ ترا دیم آرگ ءُ ایردستانی گوم ءَ یکجاھی اِنت-