بلوچستان : سی ٹی ڈی ءِ دروگیں میڑ، زورانسری بیگواھیں ورنایے کُشتگ

بلوچستان ءَ یک دروگیں میڑے ءَ پوج ءِ دست ءَ بندیگیں ورنا ءِ ٹپ ءُ ٹوریں لاش دزکپتگ-

ھمے سال ءَ زورانسری آوار جنی ءَ پد کاؤنٹر ٹیررزم ڈپارنمنٹ ءِ نیمگ ءَ چہ دزگیری پدر کنگ بیتگیں ورنا ءِ ٹپ ءُ ٹوریں لاش دزکپتگ آئی ءِ پجّار گوادر ءِ جھمنند بشیر احمد ء عبدالغنی ءِ نام ءَ زانگ بیتگ-

بیست ءُ دو نومبر دوھزار ءُ بیست ءُ چار ءَ بشیر احمد ء عبدالغنی ءِ لاش بلوچستان ءِ دمگ کیچ ءَ دزکپتگ – بشیر احمد مئی دوھزار ءُ بیست ءُ چار ءَ چہ گوادر ءَ پاکستانی پوج ءَ زورانسری آوار جتگ ءُ بیگواہ کتگ اَت، کہ اود ءَ پد سی ٹی ڈی ءُ اے وھد ءَ اُستانی وزیر داکلہ ضیاء لانگو ءَ شال ءَ پریس کانفرنس ءِ تہ ءَ آئی ءِ دزگیری پدر کتگ آئی ءِ سر ءَ بلوچ لبریشن آرمی ( بی ایل اے) ءَ سیادی ءِ بندوکی ءِ بھتام جتگ-

زانگ بہ بیت کہ گوستگیں روچ ءَ پاکستانی پوج ءِ ھمگرنچیں ادارہ آئی ایس پی آر ءَ بیست ءُ دو نومبر ءَ آواران، کیچ ءُ ڈیرہ بگٹی ءِ جتاجتائیں دمگاں لشکر کشی ءُ میڑانی میان ءَ چار مردمانی جنگ ءِ ٹاہ داتگ ات-

زانگ بہ بیت کہ اے اولی وئیل نہ اِنت کہ بلوچستان ءَ زورانسری آوار جنگ بیتگیں مردم دروگیں میڑاں کشگ بوگ ءَ اَنت – اءشی ءَ ساری ھم سی ٹی ڈی ءُ دگہ پوج ءں ادارھانی دست ءَ ھمے وڑیں وئیل دیم ءَ اَتکگ اَنت، آیانی سر ءَ بلوچ راج ءُ انسانی ھکانی باسکاں یکوئی زھرشانی کتگ اش-

ایشی ءَ ساری ھمے ماہ ءِ نومبر ءِ بندات ءَ سی ٹی ڈی ءَ ٹاہ داتگ کہ موسیٰ خیلءَ یک میڑے ءَ چار مردم جنگ بیتگ انت بلے آیانی پجّار پیسر ءَ چہ بیگواہ کنگ بیتگیں مردمانی ناماں زانگ بیتگ اَنت-

وھدے کہ ایشی ءَ ساری باز رند ءَ اے وڑیں وئیل دیم ءَ اَتکگ کہ اود ءَ لشکر کشی ءُ میڑاں پیسر ءَ چہ بیگواہ کتگیں مردم کشگ بیتگ اَنت پد ءَ میڑ ءِ نام داتگ اَنت-

انسانی ھکانی گل ایمنسٹی انٹرنیشنل ءَ پوج ءِ نیمگ ءَ چہ اے وڑیں گامگیج ٹک جنان ءَ تُرندی ءَ ایرجتگ انت ءُ لوٹ کتگ کہ پوج ءِ نیمگ ءَ چہ پیسر آوار جنگ بیتگیں مردمانی کوش ءِ گر ءُ دار ءَ پٹ ءُ پول کنگ بہ بیت اِنت ءُ ھمگرنچیں مردماں بیار اَنت جست بہ گر اَنت-