آزمانک :مُرتگیں شھر – ماھگُل بلوچ

آزمانک :مُرتگیں شھر

نبشتہ کار: ماھگُل

دی بلوچستان پوسٹ

ھَمُک بامسار ءَ آئی ءِ لوگ چَہ سُواسُو ءَ پُر اَت. نپاد، دیوالانی بُن، لوگ ءِ لاپ، دروازگ ءِ دپ ءُ دریگانی دیم ءَ سُواسُو اِتنت. اللہ بزانت چَہ کجا اَتک اَنت ءُ ھمیشاں گوں آئی ءَ چے دُژمنی اَت!-

بنی آدم گوں سُواسُواں وَ زند گْوازینت نہ کنت، پمیشکا ھمیشانی گَلّینگ ءَ آئی ءَ گُربگے داشتگ اَت. پیسر ءَ آئی ءَ پیشّی لوجر ءُ کاشُکیں ماھیگ وارینت دانکہ رامگ بہ بیت-

آئی ءَ یکین اَت کہ لاپ سیریں پیشّی پَکّائی ءَ گوں سُواسُواں سر نہ جنت، بلے پیشّی ءِ ھیلدار کنگ ءَ، آئی ءِ گْور ءَ دگہ برجم تریں ھیال نیست اَت. آئی ءَ گوں پیشّی ءَ یک واھگے داشتگ اَت، ھمے واھگ اَت کہ گوں پیشّی ءَ مھر اِت ئِے-

ھمے سوج پیربا ءُ پیربلّک ءَ داتگ اِتنت کہ پیشّی مُشکاں نیل اَنت، پمیشکا آئی ءِ دل ءَ نشتگ اَت کہ بگندۓ وھد ءِ بدل بیگ ءَ پیشّیانی تب ھم بدل بیتگ. چوناھا مُشکاں پہ وت گَٹَر گچین کتگ اِتنت، پدا پیشّی آپی ساھدارے نہ اَت-

پیربا ءُ پیربلّک زندگ نہ اِتنت کہ چرایاں سوجے بہ گیپت. مات ءُ پت ماں بازار ءَ ملک ءِ بمب گْواری ءَ شھید بیتگ اِتنت. بْرات گار ءُ بیگْواہ اِتنت. پَشت کپتگیں تھنا آئی ءِ جند اَت!-

ھما بامسار ءَ کہ ناشناس پہ بْراتانی گار ءُ بیگْواھی ءَ ماں لوگ ءَ اُرش کن اَنت، مینُل ماں شال دانشگاہ ءَ وتی ہاسٹل ءِ کوٹی ءَ زند گْوازینگ ءَ بیت، بلے مینُل ھم چَہ گار ءُ بیگُواھی ءِ مَرگ آماچیں درداں نہ رَک اِت-

شھید بیتگیں مات ءُ پت ءِ پُتنکاں چیزکے مال ءُ زر اَست اَت، مینُل گوں ھمیشاں وتی وھد ءَ تیلانک دیان اَت-

پہ بْراتانی شوھاز ءَ مینُل ءَ وتی وانگ دیم ءَ بُرت نہ کت، گڑا گارینانی شوھاز ءَ پجّاروکیں وکیل، سیاستدان، سپاھیگ ءُ اُگدارانی گْور ءَ رو آ بندات کنت-

مینُل ڈولدار اَت، دیم ئِے گِرد اَت، دپ ئِے دُرج ءُ کسان اَت. بُرز پونز، دْراج گردن ءُ پْراہ پیشانیگ ئِے اَت. جان ءَ پُرّیں کاڑے اَت-

ھما پجّاروکاں، ھرچی ءِ گْور ءَ وتی اُزر ئِے بُرت گڑا آئی ءَ گْوشت. “گم مہ کن ناشناس منی پجّاروک اَنت”-

انچوش کہ مُرگے ءَ ماں دام ءِ آیگ ءَ دان چَنڈ اَنت، گڑا ھمے گال پہ مینُل ءَ انچیں بزانتے دارگ ءَ اِتنت. مینُل ءَ وکیل، سیاستدان، سپاھیگ ءُ اُگدارانی گْور ءَ رو ءُ آیگ داں سے ءُ چار ماہ برجاہ داشت کہ بگندۓ مرچی یا باندا آئی ءِ بْرات یلہ کنگ بنت-

بلے چریشاں یکے ھم چوشیں نیست اَت کہ آیاں مینُل ءِ گُد نہ کَش اِتنت ءُ وت ءَ مینُل ءِ دیم ءَ بْرھنگ اِش نہ کت-

گار ءُ بیگْواھانی شوھاز ءَ مینُل ءِ جنین چُکّی، کودکی، ساپ دلی، بچکندگ ءُ واب وکیل، سیاستدان، سپاھیگ ءُ اُگداراں دائمی مُجاں اندیم کت اَنت-

انچوش کہ مُرگ ءِ ماں دام ءَ آیگ ءَ پد، شکاری ءِ دل لیٹ ایت، ایشانی دل ھم وتی بْرھنگ کنائینگ ءَ پد چَہ مینُل ءَ لیٹ اِت، گڑا مینُل ءَ پہ وت تھنائی گچین کت، پمیشکا واتر وتی لوگ ءَ اَتکگ اَت، بلے نی آ لوگے نہ اَت-

مُرتگیں شھر ءِ مردماں سُواسُوانی ھال ءَ آئی ءِ ھال پُرسی یلہ داتگ اَت، بلے یک روچے، آ چات ءَ پہ آپ پُر کنگ ءَ شتگ اَت، گڑا ھمود ءَ مینُل گْوشگ بیت کہ میتگ ءِ ڈگّریں کھیر ءِ بُن ءَ مروچاں مُلّایے نند ایت، ھما پہ سُواسُواں نہ رَس اِتگ-

ھمے بیگاہ ءَ مینُل دیم پہ مُلّا ءَ شت. تیارجوڑی ءَ پد، وتی ھال ئِے دات اَنت. مُلّا ءَ وتی دَم ءُ چوپ کت اَنت، پدا کاپی یے ءَ مزنیں ھسابے کَش اِت ءُ گْوشت ئِے. “تئی گْوراں دو پْریشتگ نشتگ، داں ھمے پاد میا اَنت، منی دَم کار نہ کن اَنت-

چوش کہ مینُل ءَ دام ءِ ڈن ءُ توک دوئیں بے ریائیں وھد ءَ پیش داشتگ اِتنت گڑا جست ئِے کت. “مُلّا اگاں پْریشتگ نہ شُت اَنت؟”

مُلّا ءَ پدا کاپی زُرت ءُ باریں چے چے نبشتگ ئِے کت ءُ رند ءَ گْوشت ئِے. “بانک پْریشتگ چَہ گْوراں تچ اَنت ءُ تْرکّے ءَ ٹَپ اَنت، بلے پہ مُلّا ءَ تْرک ءِ تہ ءَ روگ سک ارزان اِنت-

اناگہ مینُل ءِ ھیال ءَ وکیل گوں وتی مات ءَ وپتگ اَت، سیاستدان گوں وتی شبابیں جنک ءَ، سپاھیگ ءَ وتی جنوزامیں نماسگ بگل ءَ اَت، اُگدارانی ھال چِد ءُ گنتر اِتنت ءُ مُلّا بْرھنگ اَت- پد ءَ ھما دْرست مُلّا ءِ سر ءَ کندگ ءَ اِت انت-

مُلّا ءَ جست کت. “چے جیڑگ ءَ ۓ؟”

مینُل ءَ درّائینت. “سرشود اَتکگ اَنت، دگہ روچے کایاں”-

مُلّا ءَ سر جھل کت. مینُل وتی لوگ ءَ اَتک-

نی مینُل ءَ پیشّی ورگ نہ دات. آئی ءَ ھیال کتگ اَت کہ بگندۓ شدیگیں پیشّی گوں سُواسُواں سر بہ جنت-

چوناھا سُواسُو بامسار ءَ کاینت، پمیشکا مینُل شپ ءَ پہ آرام وپت، ھمے انچیں شپے اَت کہ سُواسُو اولی پاس ءَ اَتک اَنت-

مینُل ءَ وتی کَش گْور ءَ چار اِت، پیشّی ئِے نہ دیست. اے شپی سُواسُو بے کساس سک باز اِتنت، آ چَہ بیم ءَ لوگ ءَ در اَتک-

نی ھما مینُل اِنت پہ پیشّی ءِ پدجنگ ءَ سُواسُوانی آمیدگس ءِ شوھاز ءَ گردگ ءَ اِنت، چیا کہ پہ بْراتانی شوھاز ءَ آئی ءَ بنی آدم دیستگ اِت انت-