بلوچستان ءِ سرکار ءَ یک نوٹسے شنگ کتگ کہ آئی ءِ تہ ءَ بلوچستان ءِ تہ ءُ ڈن ءَ کار کنوکیں ٹرانسپورٹراں کڈن کنگ بوتگ کہ آ شپ ءِ وھد ءَ سپر کنگ ءَ پھریز بہ کن اَنت۔
اے پرمان چہ ادارہ ٹرانسپورٹ اُستان ءِ نیمگ ءَ پرینگ بوتگ۔
انگت ءَ اے گپ پدر نہ اِنت کہ سرکار ءَ پرچا ٹرانسپورٹرانی سر ءَ شپ ءَ سپر ءِ بندش جتگ بلے بلوچستان ءِ شال، کراچی ءُ پاکستان ءِ دگہ اُستانانی نیام ءَ روچے سداں گاڑی روگ ءُ آیگ ءَ اَنت۔
لھتے اھوالانی گشگ اِنت کہ سرکار ءَ اے پوسٹ بلوچ سلاھبندیں گلانی بوھوکیں اُرشانی ھیال ءَ داتگ۔
زانگ بہ بیت کہ باندا بلوچ لبریشن آرمی ءِ مستریں رھشون بالاچ مری ءِ بیرانی ءِ روچ اِنت کہ 2007 ءَ اوگانستان ءِ سیمسر ءِ نزیک ءَ گوں پاکستانی لشکر ءَ جنگ ءَ بیران بوتگ۔
یک دمگی اھوالکارے ءِ گْوشگ اِنت کہ بلوچ سلاہ بندیں گل اے وڑیں وھداں کوشکاریں اُرش کنگ ءَ اَنت، راہ بند کنگ ءَ اَنت، چیک پوسٹانی سر ءَ روگ ءُ لشکری کیمپ ءُ کارجاھانی سر ءَ اُرش کنگ ءَ اَنت ھاسیں رنگ ءَ وھدے کہ یک ھاسیں رھشونے ءِ سالروچ یا دگہ ھاسیں روچے ءَ کیت۔
زانگ بہ بیت اے سال ءِ اگست ءَ مزنیں اُرشے بوتگ کہ بلوچ لبریشن آرمی ءَ “آپریشن ھیروف” ءِ نام ءَ بلوچستان ءِ جتاجتائیں دمگانی سر ءَ بیلہ ءَ ھوار لشکری کارجاھانی سر ءَ اُرش کتگ۔ اے کارروائی ءَ چہ 50 ءَ گیش پوجی ءُ دگہ سرکاری کارندہ بیران بوتگ اَنت۔
اھوالکار ءِ رد ءَ اے ارش نواب اکبر خان بگٹی ءِ سالروچ ءِ درگت ءَ کنگ بوتگ ۔ نواب اکبر بگٹی 2006 ءَ ڈیرہ بگٹی ءَ جنگی آپریشن ءِ وھد ءَ مشرف ءِ سرکار ءِ دست ءَ نمیران کنگ بوتگ۔
ھمے وڑ ءَ ھمے ماہ ءِ شھیدانی روچ سیزدہ نومبر ءَ بلوچ آجوئی ءِ پھناتاں شھیدانی روچ دارگ بیتگ ھمے روچ ءَ بلوچ راجی آجوئی سنگر (براس) کہ بلوچ سلاہ بندیں گلانی یک ھمسنتین گلے ءَ بلوچستان ءِ جتائیں دمگاں چل ءُ پنچ اُرش کُتگ۔
بلے مرچی ءِ سپری بندش ، سرکاری واکدارانی نیمگ ءَ داتگیں پرمان ءَ شپ ءِ سپر ءِ بندش ءِ سبب ءَ ھچ گپ نہ بوتگ ۔