بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ سرمچار شھید سنگت عبدالغنی ءُ شھید سنگت عبدالطیف گوستگیں روچاں بولان ءُ گچک ءَ جنگ ءِ وھد ءَ راجی پرز ءَ پیلو کنان ءَ شھید بیتگ اَنت-
آئی ءَ گوشتگ بی ایل اے ءِ بھادریں سرمچار عبدالغنی پنام ءِ بلال 10 اکتوبر 2024 ءَ بولان ءَ جنگ ءِ میدان ءَ دشمن ءِ گون ءَ یک جنگے ءَ شھید بیتگ-
شھید سنگت عبدالغنی پنام ءِ بلال ء عبدالحکیم شال ءِ دمگ سریاب ءَ سیادی دار ایت- آئی ءَ گوستگیں یک سالے ءَ چہ بلوچ لبریشن آرمی ءَ ھوار بیتگ – شھید عبدالغنی کوھی میدان ءَ پیش شال ءَ گوریلا ءِ دروشم ءَ راجی پرز ءَ پیلو کنگ ءَ بیتگ-
جارکش ءَ گوشتگ سنگت عبدالغنی شھری ءُ کوھی میدان ءَ ھردوکیں جاھان دشمن ءِ سر ءَ بازیں اُرشاں ھوار بیتگ – آ مھنت ءُ ایمانداری ءِ ھواری ءَ جوانیں رنگے ءَ پرز داروکیں سرمچار بوگ ءِ ھواری ءَ مھر ءُ دوستی ءَ بندوک بیتگ ئے – آئی ءَ شپ ءُ روچ راجی آجوئی ءِ ھاتر ءَ ندر کتگ- گڈی وھد ءَ داں رھبندانی دارگ ءُ زانشت ءَ بندوک بیتگ ئے ءُ شھیدی وتی نام ءَ کتگ-
آئی ءَ گوشتگ بلوچ لبریشن آرمی ےِ سرمچار سنگت عبدالطیف 12 اگست 2024 ءَ گچک ءَ جنگ ءِ وھد ءَ یک کزاھے ءَ شھید بیتگ-
آئی ءَ گوشتگ شھید سنگت عبدالطیف پنام ءِ دُرک ء دینار مشکے ءِ ھند تنک چُٹوک ءِ جھمنند بیتگ- آئی ءَ یک سالے ءَ پیش بلوچ لبریشن آرمی ءَ بھر زرتگ ءُ راجی آجوئی ءَ دشمن ءِ ھلاپ ءَ پرکار بیتگ-
آئی ءَ گوشتگ عبدالطیف ءِ کھول ءِ ھپت مردم زورگریں پاکستانی پوج ءَ 25 دسمبر 2012 ءَ لوگانی سر ءَ ھیلی کاپٹرانی گون ءَ تیرگواری کرتگ ءُ شھید کتگ اَنت کہ ایشانی توک ءَ سَے زالبول ھوار بیتگ اَنت-
جارکش ءَ گوشتگ شھید عبدالطیف پنام ءِ دُرک راجی آجوئی ءِ زانت ءَ چکار بیتگ ءُ آئی ءَ زورگریں پوج ءِ دیم ءَ سرجھل کنگ ءَ ابید راجی آجوئی ءِ رھبند زرتگ ءُ مشکلیں جاورانی دیمپانی کنگ ءَ ابید راجی آجوئی ءِ پلسپہ ءِ راہ ءَ اوشتوک بیتگ ئے ءُ اے راہ ءِ واستا ھروھدی ءَ کربان بیتگ ئے-
گڈسر ءَ آئی ءَ گوشتگ بلوچ لبریشن آرمی سیزہ نومبر ءِ درگت ءَ شھید عبدالغنی ءُ شھید عبدالطیف ءَ ھوار دراھیں.راجی جد ءُ جھد ءِ راہ ءَ شھید بیتگیں شھیدانی گچینی کربانیاں داد دنت ءُ اے کول کنت کہ شھیدانی کربانیاں ھچبر بے ھیال نہ کنت اِنت زوت یا دیر آیانی منزل آجو بلوچستان ءَ گپت ءُ بی ایل اے سرجمیں بلوچ راج ءَ امیت دار ایت مروچیگیں روچ ءَ وتی شھیداں شریں ڈولے ءَ یات کنت اِنت-