نصیر آباد ءَ زورانسری آوار جنیانی ھلاپ ءَ زھرشانی، پولیس ءِ زھرشانی کنوک دارگ ءِ جُھد

بے تواری پروش : زورانسری آوار جنی ءِ ھلاپ ءَ اوشتگ ” ءِ سرھال ءَ چہ بلوچستان ءِ جتاجتائیں دمگاں زھرشانی ءِ درچ برجاہ –

بلوچ یکجھتی کمیٹی ءِ رِد ءَ بی وائی سی نصیر آباد نیمگ ءَ چہ بلوچ راج سر ءَ زُلم، بلوچ چُکچینی ءُ زورانسری آوار جنیانی ھلاپ ءَ زھرشانی ئیں روانک کش اِتگ ءُ زھرشانی نکش کنائینتگ-

نصیر آباد پولیس نیمگ ءَ چہ بیھار ءُ تُرسینگ ءَ اَبید نصیرآباد ءِ مردماں بلدیہ گراؤنڈ ءَ چہ اللہ والا چوک ءَ تاں روانک کش اِتگ بلے پریس کلب ءَ سر بیگ ءَ ساری پولیس ءَ بیڑبرتگ زھرشانی کنوک لَٹ کُٹ کتگ اَنت زھرشانی شنگ ءُ شانگ کتگ-

اے میان ءَ زھرشانی کنوکاں پولیس ھلاپ ءَ تُرندیں ناراہ جتگ ءُ بیگواھیں مردمانی یل کنائینگ ءِ لوٹ کتگ-

بلوچ یکجھتی کمیٹی ءِ مھم ” بے تواری پروشگ : زورانسری آوار جنی ءِ ھلاپ ءَ اوشتاتگ ” ءِ سرھال ءَ چہ بلوچستان ءِ جتاجتائیں دمگاں زھرشانی کنگ بیگ ءَ اِنت کہ اود ءَ اشی ءَ ساری کراچی، ھب چوکی، ھُزدار، تربت، پنجگور، ھاران، شال، نوشکی، دالبندین چاگی شھر ءَ زھرشانی نکش کنگ بیتگ اَنت-

بلوچ یکجھتی کمیٹی ءِ نیمگ ءَ چہ زھرشانی ءِ جار اکتوبر ماہ ءَ چہ بلوچستان ءَ زورانسری آوار جنیانی وئیل ءِ تہ ءَ گیشی ءُ تُرندی ءِ ھلاپ ءَ کنگ بیگ ءَ اِنت-