ایران ءِ برزی دفاع ءِ نیمگ ءَ وتی بیان ءِ تہ ءَ گْوشتگ کہ اسرائیل ءَ تھران، خوزستان ءُ ایلام ءِ اُستانی تہ ءَ پوجی بنجلانی سر ءَ اُرش کتگ-
آئی ءَ گْوشتگ کہ اے اُرشانی دیم ءَ سوبمندیں رنگے ءَ دیم پہ دیم کنگ بوتگ بلے لھتیں جاھاں ”کمیں تاوان“ بوتگ۔
دومی نیمگ ءَ اسرائیل ءِ دفاعی فوج ءَ گْوشتگ کہ ایران ءِ لشکری بنجلانی سر ءَ اُرش سرجمی ءَ کتگ واتر بیتگ اِنت۔
بیان ءِ تہ ءَ گْوشگ بیتگ: ”دیر نہ گوستگ کہ آئی ڈی ایف ءَ ایران ءِ بازیں دمگاں لشکری ٹارگٹانی سر ءَ ٹارگٹڈ اُرش سرجم کتگ اَنت۔
بیان ءِ تہ ءَ گْوشگ بیتگ: مئے بالی گراب سلامتی وتی ڈیھ ءَ واتر بوتگ اَنت۔
بی بی سی ءَ امریکی نیوز پارٹنر سی بی ایس نیوز ءَ گوں گپ ءُ تران کنوکیں دو دفاعی کارندھانی رد ءَ امریکی دفاعی وزیر لائیڈ آسٹن ءَ وتی اسرائیلی ھمسنت دفاعی وزیر یویو گیلنٹ ءَ گوں گپ ءُ تران کتگ۔
روئٹرز ءِ ھال رسانکدر ءَ ایران ءِ سرکاری رسانکدر ایرنا ءِ دروت ءَ ھال داتگ کہ اسرائیل ءِ اُرشاں پد ایران ءَ وتی بالی پٹ بند کتگ انت۔
ایران ءِ سول ایوی ایشن آرگنائزیشن ءِ جارکش ءَ ایرنا ءَ گوں تران کنان ءَ گْوشتگ کہ ملک ءَ تاں دگہ ھال ءِ شنگ کنگ ءَ سرجمیں بالی گراب بند کتگ اَنت۔
ایشی ءَ چہ پیسر عراق ءَ ھم وتی بالیگ دمت ءِ بند کنگ ءِ جار جتگ۔
عراق ءِ ٹرانسپورٹ ءِ وزیر ءَ گشتگ ات کہ آ دمگ ءَ برجاھیں فوجی آپریشن ءِ رد ءَ ملک ءِ برزی دمگ ءَ بند کنگ ءَ انت۔
رائٹرز ءِ ھال رسانکی ادارگ ءَ عراق ءِ سرکاری ھال رسانکی ادارگ آئی این اے ءِ درور دیان ءَ ھال داتگ کہ دمگی جیڑھانی سبب ءَ کم چہ کم یک سیکنڈ ءِ واستا درستیں بالی پٹانی سر ءَ بالیگ بند کنگ بوتگ انت۔