لھتے یات گوں سنگت سپر ھان ( شھید فدائی شوکت ) ءَ بندوک اَنت
نبشتہ کار: سنگت کوھی
دی بلوچستان پوسٹ
دل ءَ لوٹ ات کہ مروچی سپرھان ءِ سر ءَ چیزے نبشتہ بہ کن آں بلے سپرھان انچیں کِردارے ات کہ آئی ءِ کِرد ستا ءُ توسیپ ءَ پہ منی لبز کم انت ءُ کَد ءَ کسان انت اے وَ راستے گپے کہ پہ آجوئی ءِ راہ ءَ جپاکشی ءُ مکلسی ارزشت لوٹ ایت۔ جنگ مردم ءَ بُودناک کنت، جنگ مردُم ءَ رودینیت، ھمے جنگ ءِ پِڑ ءَ لھتے کِرد انچیں بُودکار انت کہ وتی تہ ءَ یک سرجمیں جنگی داستانے باں، پہ دوستاں مستاگ ءُ دژمن ءَ شھماتے باں، ھمے رنگ ءَ سنگت سپرھان اوں من پہ سرمچاری دیستگ اَت۔ سپرھان مُدام ھمے جیڑگ تہ ءَ ات کہ من پہ گلزمین ءَ چے بہ کناں، آ مُدام جُھد ءَ ات بلئے ھچبر دلجم نہ ات، سپرھان چو زِر ءِ چولانی وڑ ءَ ات، چول تیاب دپ ءِ مَلّگ ءَ بِھ سی٘ر نہ کناں، کہ من سپرھان ءِ ھمت ءُ جزبگ چو کتاب ءَ منی نابزانتی تہ ءَ جیڑگی کتگ ات گڑا وھد جنزان ات کہ یک رندے ما سپرے ءَ درکپتیں سنگت سپرھان اوں گون ات مئے دَگ دراج ءُ مِنزل دور ات ما جنزان کندان ھبر کنان رھادگ اتیں، “سنگت تو آجوئی ءِ جنز ءَ چوں آوار کپتگے؟
سپر ھان ءَ منی نیمگ ءَ چار اِت ءُ جُست کُت۔ “سنگت اے زمین ءِ مھر انت ءُ زمین ءِ مُریدانی اِشک انت “ھاھاھا۔۔۔ من کند اِت ءُ درّائینت۔ دیم ءَ انگت من وتی ھبر دراج کش کُت ءُ گشت “مئِے مات ءُ گُوھارانی بزگی گوں من چارگ نہ بوتگ، مدام جبین ءَ را سکین ءُ کینگ مانداشتگ ات ، پاداں جنزگ ءِ جزبگ موتکگ پہ باندات ءَ وتی ۔گڑا آئی ءَ من ءَ گشت کہ راست انت سنگت بلے اے راہ ءَ مارا گوں وتی ھونان گوں سابت کنگی انت کہ اے راہ ءِ تہ ءَ بزگی واری کایاں ، جنجالی ،چہ زاتی واھشتانی ھوپار ھلاس بنت ،آسراتی واب ءُ بے مانا بنت بلے ما وتن زادگ انت زمین ءِ پُسگ انت-
“من ڈولی ءَ نہ زانتگ منی راہ ءِ بَزگی”
اے زمین ھم کودین اِیت منی پاد ءِ تراولاں بورے ھال بدے مُرید ءَ منی مھر ءِ ھمبل ءَ”
ڈولی بیگ:
ھمے وڑ ءَ سپر گوْزان ءُ سپرھان جنزان ات۔ ما گپ کناں اتیں کندان اتیں، ما وتی ہند ءَ سر بوت ایں، ھرکس وتی کاراں گوں گلائش بوت، ما تاں دیر ءَ یکجاہ ءُ یک دومیگ ءَ نزیک بواں ات ایں، داں سالے ءَ گوں من یک جاہ ات ئِے، چہ آئی ءَ سک باز ھیل کنگ ءِ موہ رس ات، یک درویش تب ایں ھمبل ئِے ءِ رنگ ءَ ات، آ چو پچیں کتابے ءَ ،چو ناسرجمیں گزلے ءَ ، چو راگے ءَ گپتگیں ساز ءَ من ءَ بے سار کنگ ءَ ات (من ءَ چہ آئی ءَ دربرگ ءِ ھدوکی ءَ ھینار کتگ ات)بلے زوت زمین ءِ باھقٹ بوت ءُ رپت پہ وتی مکسد ءَ، بلے آئی ءَ یک آھے دپ ءَ چہ نکَشّ اِت، ابدماں بوت، آ بس ھمے جیڑگ ءَ ات کہ من وتی کار ءَ چتو گِھتِر بکناں، آ گوں نرمیں تب ءَ یک ملنگیں مردمے ات، گوں سنگتاں آئی ءِ سنگتی باز ڈول دار کتگ ات بس آئی ءِ ھمے سنگتَی ءُ مھنت من دیست انت گڑا من چہ آئی ءَ چہ باز دربُرت منَی سک ایں نزّیک ایں سنگتے ات من ءُ آ مدام یک جاہ نشت انت آئی ءَ مدام ھمے گپ کت کہ مارا ھر چیز کنگی انت گوں وتی ھوناں گوں سابت کنگَی انت کہ ما زمین ءِ بُودی ئیں پُسگ انت مارا چہ راج ءِ ھمت ءُ کلگ ،راج ءِ بزگیانی بار کوپگ ءَ انت راج ءِ زمہ واریاں گوں پھکیں دل ءَ سرجم کنگی انت راج وہیل دار انت اے وہیل داری مئے گوں ھوناں سودا بیت ءُ راج باندات وش ھال بیت، اگاں ما نزور بیت ایں، چہ مئے نزوری ءَ مئے راج گیشتر لگتمال بیت-
گلامی ءِ زمزیل تاں وھدے نہ سد انت تاں ما پہ ایمنی سر دات ءُ سرگوست، سرگوز مہ بنت راج زندگ بات راج سر بُرز بات-
“سر جھلی ءُ چمّ جھلی چم جھلاں مراد بات اِنت”
“سر بُرز ءُ بلند بات اَنت سربُرز ءُ بُلندانی”
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی انت-