اے ماہ ءَ پاکستانی لشکر ءَ 35 مردم چہ بلوچستان ءَ زورانسری بیگواھی ءِ آماچ کتگ اَنت-
اچ گوادر ءَ ھالانی رد ءَ پاکستانی لشکر ءَ دورو چیک پوسٹ ءِ نزیک ءَ چہ سئے ورنا دزگیر کتگ ءُ ناشناسیں جاھے ءَ برتگ اَنت۔
بلوچ نیشنل مومنٹ ءِ انسانی ھکانی گل پانک ءِ رد ءَ پاکستانی لشکر ءَ 17 اکتوبر ءَ دورو چیک پوسٹ ءِ نزیک ءَ بلوچستان ءِ دمگ کیچ ءِ نندوکیں فیصل بلوچ، حمزہ ءُ موسیٰ پہ زور بیگواہ کتگ اَنت۔
یات بہ بیت کہ اے ماہ اکتوبر ءِ تہ ءَ دی بلوچستان پوسٹ نیوز ڈیسک ءَ رس اتگیں ھالانی رد ءَ بلوچستان ، کراچی ءَ ھوار پنجاب ءِ جتاجتائیں دمگاں چہ 39 بلوچ نودربر ءُ لس مردم پہ زور بیگواہ کنگ بوتگ اَنت کہ ایشانی تہ ءَ چار پنجاب ءِ شھر لاھور ءَ چہ بیگواہ بوتگیں نودربر یل بیتگ انت وھدے کہ 35 مردم انگت بیگواہ اَنت۔
پانک ءِ رپورٹ ءِ رد ءَ گوستگیں ماہ ءَ ستمبر ءَ اے کساس 41 بوتگ وھدے کہ لھتیں مردم ھم یل بیتگ اَنت-
بلوچستان ءَ یک رندے پد ءَ پہ زور بیگواھیانی تہ ءَ گیشی اتکگ ھمے وھد ءَ جتاجتائیں دمگاں وانگ ءُ ھاسٹل ءَ نشتگیں گیشتریں نودربر پہ زور بیگواہ کنگ ءَ اَنت ۔
بلوچستان ءِ سیاسی ءُ انسانی ھکانی گلاں اے زوراکیں بیگواھیانی سر ءَ مزنیں دلپدردی درشان کتگ ءُ گْوشتگ کہ یک رندے پد ءَ ریاست پہ زوراکیں بیگواھی ءَ بلوچ ورنایاں نشانگ جوڑ کنگ ءَ اِنت کہ ایشی ءِ تہ ءَ تاں انوگ ءَ درجناں نودربر ءُ دگہ مکتب پکرانی ءُ لس شھری نشانگ جوڑ کنگ بوتگ انت۔
اے گلانی تہ ءَ میان استمانی راج ءُ انسانی ھکانی گلاں لوٹ کرتگ کہ آ بلوچستان ءَ پہ زور بیگواھی ءِ وئیلانی دیم ءَ دارگ ءِ واستا گامگیج بہ زیر اَنت۔
زانگ بہ بیت کہ اقوام متحدہ ءِ انسانی ھکانی گلاں ھم بلوچستان ءَ زوراکی ءَ بیگواہ کنگ ءِ بابت ءَ وتی جیڑہ درشان کتگ کہ اود ءَ اقوام متھدہ شھری ءُ سیاسی ھکانی رکھینگ ءِ کمیٹی ءَ پاکستان ءَ بلوچستان ءَ شھری ءُ سیاسی ھکانی جاور ھال ءِ سر ءَ چار ءُ ٹپاسی کتگ من زوراکی ءِ جیڑہ دیم ءَ آورتگ اَنت-
اقوام متحدہ ءِ کمیٹی ءِ رد ءَ 2004 ءَ بگر داں 2014 ءَ زوراکی ءَ بیگواہ کنگ ءِ 7000 ءَ چہ گیش کیس نبشتہ کنگ بوتگ اَنت وھدے کہ اے کیس روچ پہ روچ گیش بوھگ ءَ اَنت۔
اقوام متحدہ ءِ شھری ءُ سیاسی ھکانی رکھینگ ءِ کمیٹی ءِ دیوان مرچی جنیوا ءَ برجاہ بوتگ، ایشی ءِ تہ ءَ کمیٹی ءِ جیڑہ ءِ گمان پاکستانی ٹولی ءِ جنیوا ءِ دیم ءَ پسو ایر بہ کنت اِنت-