سامراج کی موت
فرانز فینن
نبشتہ کار: تنویر بلوچ
دی بلوچستان پوسٹ
کتاب “سامراج کی موت” فرانز فینن(کہ الجزائر ءِ تحریک ءِ جھدکارے بیتگ) ءَ سال 1959 ءَ نبشته کتگ. کتاب ءِ تہ ءَ فینن ءَ بازیں سرهالانی سر ءَ نبشتہ کتگ کہ آ الجزائر ءِ تحریک ءَ دیم ءَ اتکگ اَنت ءُ هما چاگردی جیڑه کہ تحریک ءِ سبب ءَ آیانی تہ ءَ مٹی اتکگ.
فینن ءِ کتاب(سامراج کی موت) هما وهد ءَ نبشتہ کتگ وهدے کہ فرانس ءِ زوراکیانی ششمی سال ما الجزائر ءَ برجاه بیتگ. اے کتاب پنچ باب ءِ تہ ءَ انت. کتاب ءِ اولی باب ءَ الجزائر ءِ تحریک ءَ زالبولانی کرد ءِ سر ءَ نبشتہ اِنت.
فینن نبشتہ کنت کہ، یک چاگردی تہ ءَ مردمانی زندگی گوازینگے وڑ ءُ ڈول ءُ چہ اهانی پچ ءُ پوشاکاں زانگ بیت. دگنیا ءِ تہ ءَ جتائیں دودماناں چہ سیادی داروکیں راجانی پچ ءُ پوشاک جدا اَنت. ھمے وڑ ءَ الجزائر ءِ زالبولانی پچ ءُ پوشاک هم چہ روایرکپتی دمگانی زالبولاں چہ جتا اِنت. اگاں یک دری یے مردم ءِ کیت گڑا آ دری ءُ الجزائری زالبولانی نیمگ ءَ تپاوت ارزان کت کنت.
وهدے کہ فرانس الجزائر ءِ سر ءَ کبزه کنت گڑا ھمے چاگردی ربیدگی دیم ءَ مزنیں اڈاند جوڑ بنت. ایشاں چہ رکگ ءِ واست ءَ زوراور هر وڑیں پندل ساز اِیت تاکہ رودراتکی ءُ روایرکپتی زالبولانی نیام ءَ تپاوت هلاس کنگ بہ بیت. زوراور سرپد اَت کہ الجزائری چاگردانی گیشتر دار ءُ مدار گوں زالبولاں بندوک اَنت.
پرچا کہ یک زالبولے گْوهارے بیت کنت، زهگ ءِ بیت کنت، لوگ بانُک بیت کنت. پمیشکہ زورآور ءَ پهم اتگ اَت کہ الجزائری چاگر ءَ بدل کنگ ءَ پیسر ءَ من ءَ اد ءِ زالبولانی پگر بدل کنگ لوٹ اِیت۔ زالبولاں چہ بُرکه ءَ کشگ ءِ واستا فرانسیسی زورآوراں وڑ وڑیں پندل ساز ات آ داں هدے ءَ کامیاب هم بیتگ اَت. وهدے کہ الجزائری زالبولاں وتی بُرکہ چگل دات اَنت ءُ فرانس ءِ ربیدگی پچ ءُ پوشاک اش گور ءَ کت گڑا زورآوراں مار اِت کہ آ الجزائری زالبولانی مارشت مٹ کتگ اَنت نوں آهاں وتی نپ ءُ پائدگ واست ءَ کارمرز کُت کنت.
وهدے کہ زورآور زالبولانی مجگی مارشتانی مٹ کنگ ءَ کامیاب بیت گڈڑا آیاں وتی ادارهانی تہ ءَ جاگہ دیگ بندات کت دانکے آیانی برورد ءَ وتی کبزه ءَ الجزائر سر ءَ برجاه داشت بکنت.
ھمے وهد ءَ الجزائر ءِ تہ ءَ آجوئی لوٹوکیں تحریک ءَ( لبزیشن فرنٹ) جُنزگ ءَ بیت. لبریشن فرنٹ ءَ مار اِت کہ فرانس مئے زالبولاں مئے هلاپ ءَ کار مرز کنگ اِنت ءُ مئے ربیدگ ءُ دودمان ءَ هلاس کنگ اِنت. فرانس ءِ اے اَملانی هلاپ ءَ لبریشن فرنٹ ءَ وتی Counter Insergnci بنا کت. آیاں کوچگ ءُ شهرانی تہ ءَ بُرکہ پوشگ لَس کُت ءُ لبریشن فرنٹ ءِ تہ ءَ زالبولانی آیگ ءِ راه پچ کُت ایشی ءَ چہ چیش الجزائر ء زالبولاں تهنا گِس ءِ کاراں داں لُکّ ات اَنت.
وهدے کہ لبریشن فرنٹ ءَ آهانی تحریک ءِ بهر بیگ جار جت گڑا زالبولاں مزنیں کسھاں بهر زُرت ءُ آیانی سیاسی تربیت کنگ بنا کُت.
وهدے کہ فرانس ءِ وتی زوراکی گیش کت انت ءُ تحریک ءِ کار اوشت ءِ آماچ بیت انت. فرانس ءِ زورآکیانی گیش کنگ ءَ هوار وتی چیک پوسٹا هم گیش کنت کہ اود ءَ هرچ کس ءِ چار اِت ءُ آیانی ساز ءُ سامان اِش هم چار ات اَنت ، اے جاوراں لبریشن فرنٹ ءَ وتی ساز و سامان، توپک یک دمگ ءَ چہ دومی دمگ ءَ برگ سک گران بیت. اے چیک پوسٹانی سر ءَ بس زالبول چارگ نہ بیت انت کہ آیانی برکہ پوشتگ ات. فرنٹ ءَ ساز ءُ سامانانی برگ و آرگ زمہ زالبولاں دات. چرشیا چہ فرانس ءِ چمانی چیر ءَ چہ بُرت انت.
لبریشن فرنٹ ءَ هما زالبول کہ بس وتی گسی کاراں داں لُکّ ات انت آ زرت انت ءُ تحریک ءِ یک بهرے کُت انت. نوں الجزائری زالبول نہ تهنا گِس ء لُکّ ات اَنت بلکیں آ تحریک ءِ تہ ءَ وتی براتاں گوں هم کوپگ ات اِنت. لبریشن فرنٹ ءَ زالبولانی واستا جتائیں ٹرینگ سینٹر هم جوڑ کت کہ اود ءَ ایشانی تربیت کنگ بہ بیت.
زالبولانی تحریک ءِ بهر بوگ ءَ پد الجزائر تحریک دو گام دیم ءَ شُتگ اَت. زالبولانی آیگ ءَ پد سرجمیں الجزائر تحریک ءَ وتی دست چیر ءَ کُتگ اَت. یک چاگردی نہ تهنا زالبول پہ گِس کار ءَ گوں لُکّ بہ بیت بلکیں اگاں زالبول تحریک ءَ هوار کنگ بہ بنت داں تحریک شریں وڑے ءَ دیم ءَ شُت ءُ جهد کت کنت.
انچوشکہ ما گندگ ءَ اِیں کہ بلوچ ءِ تحریک ءَ مرچی زالبولاں رھشونی کنگ. آ سرپیس سیاست بہ بیت یا کہ سلاه بندیں جهد ءَ را کجام جاه ءَ بلوچ زالبول گوں وتی براتاں هم کوپگ اَنت. اگاں ما گیش ءَ چہ گیش جُهد بکن اَنت وتی چاگرد ءِ همک فرد ءَ تحریک ءِ بهر جوڑ بکن اِنت داں مئے جُهد شریں وڑے ءَ دیم ءَ روت.
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت-