بلوچستان ءِ دمگ ککی ءَ ناشناسیں سلاہ بندیں مردمانی اُرش ءَ اشکرانی کھن ءَ کار کنوکیں 20 کارمند بیران ءُ 7 ٹپیگ بوتگ انت۔
دمگی واکدارانی رد ءَ اے اُرش گوستگیں شپ ءَ دکی ءِ نزیک ءَ پولیس ءِ دمگ ءَ بوتگ۔
دکی پولیس ءِ ایس ایچ او ہمایون خان ناصر ءَ گشتگ کہ نامالومیں سلاہ بندیں مردم دمگ ءَ اتکگ انت ءُ کارکنانی سرا تیر گواری اش کتگ۔
آئی ءَ گوشت کہ بیران بوتگیں مزدورانی تہ ءَ چار مزدور اوگانستان ءَ گوں سیادی دار اَنت وھدیکہ دگر بلوچستان ءِ دمگ ژوب، قعلہ سیف اللہ، پشین، موسی خیل ءُُ کُچلاک ءَ گوں سیادی دار اَنت۔
انگت ءَ کس ءَ اے اُرش ءِ ذمہ واری نہ زرتگ۔
دمگی اھوالکار عبدالحکیم ناصر ءَ گْوشتگ: دکی ءِ پیش اتکگین وئیل ءِ ھلاپ ءَ زھرشانی کنگ ءِ پیسلہ کنگ بیتگ۔ آئی ءَ گوشت کہ شھر ءَ مرچی واپار جاہ بند انت ۔
ایس ایچ او ھمایون خان ناصر ءَ گوشتگ اے دمگ ءَ گوستگیں شپ ءَ سلاہ بندین مردماں یک مزنیں کچے ءَ بیڑ برتگ ءُ آیانی نزیکیں کھن ءِ سر ءَ کار کنوکیں مزدور نشانگ کتگ اَنت-
آئی ءَ گْوشتگ کہ سلاھبنداں کارکنانی سر ءَ اُرش کنگ ءَ ابید جتاجتاھیں کانانی سر ءَ مشینری آس داتگ اَنت۔ دہ انجن ھوار انت۔
ایس ایچ او ءَ گشتگ کہ وئیل ءِ جتا جتائیں تک ءُ پھناتاں چہ پٹ ءُ پول برجاہ انت۔
لاش پوسٹ مارٹم ءِ واستا روان دیگ بوتگ اَنت وھدیکہ ٹپیگ پہ دوا ءُ درمان ءِ واستا ڈسٹرکٹ ہیڈ کوارٹر ہسپتال دکی ءَ سر کنگ بوتگ اَنت۔