ماہ رنگ بلوچ سر ءَ سفری پابندی انسانی ھکانی گلاں ایر جتگ

انسانی ھکانی گلاں پاکستانی واکدار نیمگ ءَ بلوچ کارکن ءُ ٹائم میگزین داد مراگش ءَ بھر زیرگ ءَ چہ دارگ ایر جتگ-

گوستگیں شپ ءَ پاکستانی واکدار ءَ بلوچ یکجھتی کمیٹی ءِ آرگنائزر ءُ بلوچ سیاسی کارکن ڈاکٹر ماہ رنگ بلوچ ٹائمز میگزین داد ءِ مراگش ءَ بھر زیرگ ھاتر ءَ امریکہ ءَ چہ دارگ بیتگ کہ اود ءَ آ میگزین نیمگ ءَ لوٹائینگ بیتگ-

اے میان ءَ ماہ رنگ بلوچ کراچی ائیرپورٹ سر ءَ ایف آئی اے واکدار ءَ پنچ کلاکاں تاں داشتگ ءُ آئی ءِ پاسپورٹ ھم دستیگ کتگ-

اے درگت ءَ چہ ماہ رنگ بلوچ ءَ گوشتگ کہ آ ایگزٹ کنٹرول لسٹ ( ای سی ایل ) مان کنگ ءَ ھچ وڑیں سبب ءَ ابید سفر کنگ ءَ چہ داشتگ ءُ آ تُرسینتگ-

دومی نیمگ ءَ پاکستانی ءُ میان استمانی انسانی ھکانی ادارھاں اے وئیل ءِ تُرندی ءَ ایر جتگ واکدار ءَ چہ ماہ رنگ بلوچ ءِ پاسپورٹ ءُ دگہ چیزانی دیگ لوٹ کتگ-

ھیومن رائٹس کمیشن آف پاکستان ءَ ایف آئی اے واکدار اے گامگیج ایر کتگ گوشتگ انسانی ھکانی کارکنانی ھلاپ ءَ اے وڑ گامگیج منّگ نہ بنت ءُ آئی ءَ سپر کنگ ءِ دارگ ءُ آجوئی ھیال ءُ لیکہ ءُ سُر پر ءِ ھک ءِ ھلاپ ورزی اِنت-

آئی ءَ گوشتگ کہ ڈاکٹر ماہ رنگ بلوچ زورانسری آوار جنی ءِ درکانودی کوش ءِ ھلاپ ءَ وتی سیاسی جھد ءِ ھاتر ءَ زانگ بیت، ءُ ھمے سبب ءَ چہ آ میان استمانی ھساب ءَ نام رس اِتگ- گل ءَ اے گپ ءَ سر ءَ زور داتگ کہ واکدار ماہ رنگ بلوچ ءَ را آجوئی ءُ مھریں دروشم ءَ چہ سفر کنگ ءَ موکل بدے اَنت-

انسانی ھکانی کارکنانی پھاز ءِ درگت ءَ اکوام متھدہ ءِ ھاسیں نمائندگ میری لالر ءَ اے وئیل سر ءَ وتی تُرس درشان کتگ گوشتگ کہ زی پاکستانی پوج ادارھانی نیمگ ءَ موکل نہ رسگ ءُ اشی ءَ پد تُرسینگ، بیھار دیگ ءُ بندیں رویشگ ءِ سر ءَ بژن درشان کتگ-

یورپی ڈیھ آئرلینڈ ءِ شھر ڈبلن ءَ برجاہ دگہ یک انسانی ھکانی گل فرنٹ لائن ڈیفنڈر ءَ ھم اے وئیل ایر جتگ-

آئی ءَ گوشتگ کہ، ما ڈاکٹر ماہ رنگ بلوچ ءِ گوم ءَ بیتگیں رویشگ ءَ گوں تُرندی ءَ ایر جن ایں ءُ پاکستانی واکدار ءَ چہ لوٹ کن ایں کہ آ آئی ءِ ھکانی کہ پاکستان ءَ سُر پُرانی آجوئی ءِ پھاز یک ءَ دلجمی بکنت-