گوریچانی وزیرستان ءِ دمگ سپن وام ءَ پاکستانی پوج سر ءَ یک تُرندیں اُرشے ءَ لیفٹننٹ کرنل ءُ پنچ سپاھی کشگ بیتگ اَنت وھدے کہ یک افیسرے ءَ ھوار بیست یک نزیک ءَ کارمند ٹپی بیتگ اَنت-
پاکستان پوج ءِ ھمگرنچیں ادارہ ( آئی ایس پی آر ) رِد ءَ چار ءُ پنچ اکتوبر ءِ میانی شپ ءَ کاروائی کنگ بیتگ، تُرندیں تیرگواری ءِ میان ءَ لیفٹینٹ کرنل محمد علی شوکت ءَ ھوار شش کارمند کُشگ بیتگ اَنت-
آئی ایس پی آر ءَ گوشتگ کہ بیران بیتگیں پنچ سپاھیانی تہ ءَ لانس نائیک محمد اللہ، لانس نائیک اختر زمان، لانس نائیک شاھد اللہ، لانس نائیک یوسف علی ءُ سپاھی جمیل احمد ھوار اَنت-
آئی ءِ گْوشگ اِنت کہ لیفٹیننٹ کرنل محمد علی شوکت آپریشن ءِ سروکی ءَ کنگ ءَ بیتگ-
کشگ بیتگینانی تہ ءَ چل سے سالی ئیں لیفٹیننٹ کرنل محمد علی شوکت ءِ چہ سیادی فیصل آباد ءَ اِنت- سی سالی ئیں لانس نائیک محمد اللہ ءِ سیادی چہ خیبر ءَ اِنت- سی سالی ئیں لانس نائیک اختر زمان ءِ سیادی چہ لکی مروت ءَ اِنت – بیست نُھ سالی ئیں شاھد اللہ ءِ سیادی چہ ٹانک ءَ اِنت- سی یک سالی ئیں لانس نائیک یوسف علی ءِ سیادی چہ لوئر ءُ کزئی ءَ اِنت- سپائی جمیل احمد ءِ سیادی چہ سوات ءَ اِنت-