پشتون جرگہ: دو نودربر شرینگل یونیورسٹی ءَ دزگیر

پشتون تھپز مومنٹ ءِ نیمگ ءَ ھیبر ءَ برجم بوھوکیں پشتون جرگہ ءِ پلامرزی ءَ دو نودربر شرینگل یونیورسٹی ءَ پولیس ءَ دزگیر کتگ انت-

پشتون تھپز مومنٹ ءِ سروک منزور پشتین ءَ چاگردی ترامجاہ ایکس ءَ نبشتگ کنان ءَ گوشتگ گوستگیں شپ ءِ نیم ءَ پولیس ءَ پشتون ھنداں بیڑ برتگ ءُ اود ءَ دو نودربر چہ شرینگل یونیورسٹی ءَ دزگیر کتگ ءُ برتگ اَنت-

ھردوکیں نودربرانی پجار مصطفیٰ خان ءُ امین یوسفزئی ءِ ناماں زانگ بیتگ اَنت-

آئی ءَ گوشتگ ایشانی توک ءَ مصطفیٰ خان شرینگل یونیورسٹی ءَ ءُ امین یوسفزئی چہ لوگ ءَ پولیس ءَ دزگیر کتگ ءُ برتگ –

ایشی ءَ پیش پشتون جرگہ ءِ پلامرزی ءَ شانزدہ نودربر ھم آوار جنگ بیتگ اَنت کہ آیانی تہ ءَ لھتے ءِ پجار ‏ایمل خان، عباس، شادمان، زاهد، واحد ودود، فیضان، اسدالله قاسمي، خیبر یوسفزئی، طارق شا، اسد خان، اصیل خان، حیدرخان، ازل خان، اتل خان، عبدالرزاق، احسان اللہ ءُ دگہ ھوار اَنت-

زانگ بہ بیت گوستگیں چیزے روچانی توک ءَ پشتون جرگہ ءِ ھلاپ ءَ پولیس ءِ کریک ڈاؤن برجاہ اَنت ءُ آیانی آنسوگیس ءُ دگہ دگہ ڈولاں شینگ ءُ شانگ کنگ ءَ تاکت کارمرد بوگ ءَ اَنت-

یازدہ اکتوبر ءَ ھیبرپکتوانوا ءِ ھند ھیبر ءَ پشتون ءِ یکجاھی ءَ پشتون جرگہ ءِ نام ءَ یک مُچی یے برجم بوگ ءَ انت کہ اود ءَ مزنیں کساسے ءَ پشتون راج یکجاہ بوگ ءُ وتی ھکانی ھاتر ءَ گھگیری کنگ ءَ اَنت-