بِساک رژن ءِ چیدگ اِلم ءِ دَرسگاہ
نبشتہ کار : تاھیر توکلی
دی بلوچستان پوسٹ
بِساک ءِ راجدپتری پشدر : بِساک بزاں کہ (بلوچ اسٹوڈنٹ ایکشن کمیٹی) ءِ گوستانکی بندپتر ءَ چمے شانک بہ دے اِیں گُڑا بِساک ءِ بندات چہ Butiems سھدربرجاہ ءَ انتزامی موکل ءِ پالیسی ءِ بگیری ءَ اِیر کنگ بیت اِنت کہ اولی رند ءَ بِساک بلوچ نودربرانی ھک ءَ یک شُد ءِ زھرشانی کیمپ ءِ ما بیوٹمز یونیورسٹی ءَ برجاہ دار اِیت۔
آئی ءِ لوٹ بلوچ نودربراں ءَ ڈسٹرکٹ کوٹہ ءِ تہ ءَ درستیں ڈیپارمنٹاں داھلہ دیگ بہ بیت بِساک ءِ بنّشت ایر کنوکانی سرِپرِست ءَ شھید کمبر چاکر ءِ نام مان اِنت کہ شھید کمبر چاکر اے زمانگ ءَ بیوٹمز ءَ وانگ ءَ ھم بیت وھدے سنگت وتی کیمپ ءَ بساک ءِ نام ءَ برجم داراں گُڑا انتزامی ءِ نیمگ ءَ چے ھچ وڑیں رسپونس دیگ نہ بیت۔
دیمتر ءَ سنگت مجبور باں کہ وتی زھرشانی کیمپ ءَ شال پریس کلب ءِ دیم ءَ برجم داراں چندے روچانی گوزگ ءَ پَد انتزامی ءَ گوں شور ءُ سلاہ بیت درستیں منّانک منّگ باں ءُ اے کیمپ چِداں چِست کنگ بیت۔
اے ھمے زمانگ اِنت کساس (2009 یا 2010) کہ بلوچستان ءِ تہ ءَ ریاستی (kill and dump) پالیسی ریاست ءِ نیمگ ءَ چے بندات کنگ بوتگ اَت۔ گُڑا سر زاھری سیاست ءِ واست ءَ گراؤنڈ سک تنگ کنگ بیت بازیں نودربر لیڈرےجنگ بیت ءُ بازیں ءِ زنداناں بندیگ کنگ بیت۔
چُشکہ بِساک ءِ پؤنڈر کمبر چاکر ھم ھمے وھد ءَ نمیران کنگ بیت اِنت۔ گُڑا سرزاھری سیاست ءِ واست ءَ روچ پہ روچ چاگرد ناساز بنت، بلے تاں ھَدّے ءَ سنگت وتی کچ ءِ ھساب ءَ کاراں جنزیناں کناں متلب کار انچو سُست رُوی ءَ گوں کنگ باں یاکہ گرؤنڈ ءِ unstability ءِ سبب ءَ بازیں کسانیں چِست اِیر گندگ ءَ نیا اَنت۔
بلے بساک ءِ سنگت وتی ہمت ءُ ھوسلہ ءِ ھساب ءَ جنزاں کناں تانکہ بساک ءِ اولی کونسل سیشن ءَ بزانکہ 2018 ءَ سر کناں کہ اے بِساک ءِ اولی کونسل سیشن بیت کہ اِیشی ءِ تہ ءَ ڈاکٹر نواب بلوچ مرکزی چیرمین ءُ سلمان بلوچ مرکزی جنرل سیکریٹری گیچین کنگ باں۔
نوں بساک وتی سیاسی پروگرام ءَ بلوچ نودربرانی تہ ءَ گیش کناں کنت دیم ءَ جنزاں کنت چشکہ اوتھل یونیورسٹی ءَ او آدگہ ادراہانی تہ ءَ سَر بیت بلوچ نودربراں ءَ بلوچ ءِ گواچنی سیاست ءَ گوں ھمگرنچ کنت ھمے وڑ ءَ وتی اے سپر جنزیناں کنت دیم پہ وتی دوھمی کونسل سیشن ءَ روت اِنت۔
متلب اے دوئیں سالانی تہ ءَ بساک بلوچستان ءِ مستریں ادراھانی تہ ءَ وت ءَ سر کنت ءُ بلوچ نودربرانی سیاسی سرکلنگ ءَ جنزین اِیت بازیں کَچّے ءَ نودربر ہمراہ داری کناں کن اَنت تانکہ دومی کونسل سیشن ءَ بِساک ءِ دوھمی کونسل سیشن 2021 ءَ ما کراچی ءَ برجم دارگ بیت اے کامیابیں کونسل سیشن ءِ تہ ءَ ڈاکٹر صبیحہ بلوچ مرکزی چئیر پرسن ءُ آصف بلوچ مرکزی جنرل سیکریٹری گیچین کنگ باں اے کونسل سیشن پہ بِساک ءِ دیمروی ءِ واستا یک ھاسیں سیشن ءِ بیت کہ اے دوئیں سالانی تہ ءَ گَل گوں وتی لیڈرشپ ءَ سرجمیں بلوچستان ءَ تالان بیت کراچی ءَ بِگر دانکہ ڈی جی خان ءَ او خضدار ءَ بگر دانکہ مکُران ءَ گَل وت ءَ سرجم ءَ فعال کنت ءُ سیاسی سرکلنگ ءُ وتی پروگرام ءَ جنزیناں کنت اے دورانیاں ءَ گُل بازیں اڈ جنجلانی آماچ بیت بلے سنگتانی گیشیں کربانی ءُ ستکی ءِ سبب ءَ بِساک ھمُک بلوچ نودربر ءِ امیت جوڑ بیت گراؤنڈ یک برے پد ءَ سیاسی چِست ءُ اِیرانی بنجل جوڑ بیت نودربر یک برے پد ءَ گواچنی سیاسی اَمل ءِ بھر جوڑ باں ءُ بَساک ءِ لیکہ ءُ پروگرام ءَ مھکم کنان ءَ جنزاں کن اَنت ھمُک ادراہ ءِ تہ ءَ بِساک ءِ باوست بندات بیت بِساک نودربراں ءَ وتی وس ءُ واکے ءَ کدّ ءَ آشوبی روشتانی بھر کنت ءُ دَر آشوبی روشتاں چے رکینگ ءِ کوشست ءَ کنت تانکہ نودربر اے بیست یکمی کرن ءَ وتی بِستار ءَ بتور بلوچ نودربر سرپد بہ باں کہ آھانی کوپگ ءَ پہ بلوچ راج ءَ بازیں امید ءِ بندوک اِنت ھمئے نودربر کہ آہاں وتی گوستانک، راجی بامرد ، وتی دودمان شمُشتگاں گڑا پہ مئے واست ءَ بدبکتی ءِ بیت کہ آھاں وتی پجّار شمُشت ءَ گُڑا بِساک اے سرجمیں بُڈہ ءَ وتی کوپگاں زوریت ہمُک ادراہ ءِ تہ ءَ وتی سیاسی چِست ءُ اِیراں جنزیناں کنت وتی نودربرانی تہ ءَ سیاسی سِنچ ءُ سَما ءَ ودی کنگ ءِ کوشست ءَ کنت تانکہ نودربر گیش ءَ چہ گیش وتی پجّار ءَ چے آشنا بہ باں ہمئے وڑا بساک اے سیاسی سپر ءَ جنزیناں کنت ءُ دیم پہ وتی سِیمی کونسل سیشن ءَ سر بیت بِساک ءِ سیمی کونسل سیشن 2023 ءَ ما شال ءَ برجم دارگ بیت کہ اے کونسل سیشن ءِ تہ ءَ شبیر بلوچ مرکزی چیرمین ءُ اظہر بلوچ مرکزی جنرل سیکریٹری گیچین کنگ باں اے کونسل سیشن ءِ سوگندی دیوان ما بی ایم سی کالج گراؤنڈ شال ءَ برجم دارگ بیت کہ اے دیوان ءَ کساس 2000 نودربر بھر زور اِیت اے دیوان گَل ءَ ما بلوچستان ءِ تہ ءَ اے وھدے مستریں نودربر گَل ءِ اھزاز ءَ بکش اِیت نوں گَل بلوچستان ءَ یک تاکت وڑیں گَل ءِ دورشم ءَ دیم ءَ کیت بازیں نودربرے گَل ءَ املی رد ءَ آوار بیت ءُ بازینے گَل ءِ دوزواہ جوڑ بیت ہرچ مزن کسانیں پروگرامانی ھاتر ءَ گَل ءَ مالی ءُ اکلاکی کُمک کن اَنت بزانکہ بِساک ءَ یک راجی گَل ءِ بِستار منّت اَنت ءُ گَل ءِ کُمک ءَ وتی راجی زمہ واری سرپد باں ہمے وڑا گَل گوں وتی نودربر ءُ لس مہلوک ءِ کمُک روچ پہ روچ دیم ءَ جنزاں کنت ءُ نوکیں ھیال دیم ءَ کار اِیت
بِساک ءِ دیمروی ءِ پشدر: چُشکہ گَلانی دیمروی ءِ مستریں سبب آئی ءِ لیڈرشپ ءِ مھکمی ءُ نوکیں ھیالانی دیم ءَ آرگ ءِ سبب ءَ دیمروی کنت ھمے وڑ ءَ گَل نوشت تاک ءِ نام ءَ نودربرانی واستا یک سیاسی لٹریچرے جنزیناں کنت انّوں تک ششُمی نوشت تاک گَل ءِ نیمگ ءَ چاپ ءُ شنگ کنگ بوت ءَ پہ گونڈوانی واست ءَ گام ءِ نام ءَ یک کسانیں لٹریچرے دیما آرگ ءِ کوشست ءَ کنت تانکہ بلوچ گونڈو وتی گوستانکی کسہ ءُ دود ءُ ربیدگی گَپ ءُ گالاں چے بے سما مہ باں انّوں ءَ تک گَل ءِ نیمگ ءَ گام ءِ دو تاک چاپ ءُ شنگ کنگ بوت ءَ کہ لس مھلوک ءِ تہ ءَ باز منّگ بوتگاں ءُ گَل ءِ اے راجی کارانی ھوسلہ بکش کنگ بوت ءَ کہ گَل گیش چہ گیش اے رنگیں کارانی واست ءَ نوکیں ھیالات دیم ءَ بیاریت تانکہ ما وتی پجار، زبان گوستانک ءُ دودمان ءَ چے آژناگ بہ باں ہمئے وڑا گَل ءِ دیمروی ءِ یک مستریں سبب ءِ اِش اِنت کہ گل ءِ کار آدگہ درستیں گَلاں چے جتا باں گَل روایتی رنگ ءَ جنزگ ءَ ابید نوکیں اھدے لوٹانی ھساب ءَ جنزاں کنت نوکیں پالیسی اڈ دنت چشکہ وانگی چست ءُ اِیراں گیش کنت بلوچستان ءِ جتائیں جاگھاں بلوچستان کِتاب کاروان ءِ نام ءَ کتاب مراگہ برجم داریت تانکہ وتی نودربراں ءَ وانگ ءِ نیمگ ءَ آرگ ءَ سوبیں بہ بیت ۔
ھمئے وڑ ءَ گَل وتی کار ءُ پالیسیانی تہ ءَ مَٹی ءُ بدلی آراں کنت ،،بلوچ لٹریسی کیمپئن ،، ءِ نام ءَ بلوچستان ءِ سرجمیں اسکولاں دورا کنگ بیت آھانی ڈیٹا لس مھلوک ءِ دیم ءَ آرگ بیت کہ بلوچستان ءِ وانگی جیڑہ چوں ودی کنگ بوتگاں آھانی سبب چی آں چنچو کَساس ءَ تک اسکول بنداں بزانکہ ھکومت ءِ نام نھادیں( پڑھے گا بلوچستان ، بڑے گا بلوچستان ) والا بیانیہ ،، بلوچ لٹریسی کیمپن ،، ءِ نیمگ ءَ چے پدر کنگ بیت کہ اِدا مئے واستا اسکول کہ جوڑ کنگ بوتگاں اے تھنا بلوچستان ءِ بجٹ ءَ چے زر زورگ ءُ ماڑی مِک کنگ بوت ءَ تانکہ نام نھادیں نمائندھاں ءَ کرپشن ءِ موہ بہ رس اِیت ھمے وڑا باز کسان ءُ مزنیں پروگرامانی وسیلہ ءَ گَل بازیں ہنداں راجی بامردانی نام ءَ فیسٹیول اڈ دنت وتی بامردانی کِرد ءَ ساڈائیت بلوچ راج ءُ بلوچ نودربراں ءَ وتی گواچنی رھشون ءَ چے آژناگ کنت بزانکہ بَساک ءِ بنشت ءَ بگر تانکہ انّو ءَ بیا گَل ءِ ہر کار گَل ءِ لیکہ ءِ بنیات جنزینگ بوھگ ءَ اِنت ءُ ہمے لیکہ ءِ وسیلہ ءَ گَل روچ پہ روچ ءَ بلوچستان ءِ تہ ءَ دیمروی کناں اِنت ءُ دیما سپر ءَ انت-
بِساک میزران بات
بلوچستان آباد بات-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسانی درشانی اِنت-