بی این ایم ءِ یک ٹولی ءَ اکوام متھدہ ءِ ھاسیں نمائندگ ڈاکٹر ایلیسا مورجیرا ءَ گوں گند ءُ نند

بلوچ نیشنل موومنٹ ءَ شنگ کتگیں درشان ءِ رِد ءَ پارٹی ءِ یک ٹولی ءَ اکوام متھدہ ءِ مولمی مٹی ءُ انسانی ھکانی ھاسیں نمائندگ ڈاکٹر ایلیسا مورجیرا ءَ گوں گند ءُ نند کتگ – اے ٹولی ءَ فھیم بلوچ، نیاز بلوچ ءُ یوسف بلوچ ھوار بیتگ اَنت-

اے گند ءُ نند ءَ پارٹی ءِ نمائندگیں ٹولی ءَ بلوچستان ءَ انسانی ھکانی جاور ءُ بلوچستان ءَ مولمی مٹی ءِ درگت ءَ اسرکپگ ءِ درگت ءَ گپ کتگ-

آیاں تر ءُ گردیں ٹولی ءَ بلوچستان ءَ چاگردی ءُ مولمی مٹیانی سر ءَ پاک چین اربانی ڈالر ءِ شوربندیاں اسرکپگ ءَ سر ءَ سرپدی داتگ- آیاں انسانی ھکانی لگتمالی ءَ چہ کچ ءُ کساس ھم پیش کتگ اَنت-

چاگردی مٹی ءِ درگت ءَ سرپدی دیوکیں یوسف بلوچ ھم اے ٹولی ھوار بیتگ، آیاں بلوچستان ءَ مولمی مٹی ءِ تُرسناکیں اسرکپگ ءِ سر ءَ چمشانک داتگ – ٹولی اے گپ سر ءَ زور داتگ کہ دمگ ءَ مولمی مٹی وت اناں بلکیں مردمانی جوڑ کتگین ءِ-

پسّہ ءَ تر گرد ٹولی ءِ چاگردی ءُ انسانی ھک ءَ ٹولی دلجمی داتگ کہ آ اے جیڑہ سر ءَ یک یکجاھی رپورٹے جوڑ بہ کنت ءُ پاکستان ءَ جست گرگ ءَ وتی جھد ءَ تُرند بکنت-

اے ٹولی ءَ چاگردی ءُ انسانی ھکانی اے نازرکیں جاور ءَ گر ءُ دار ھاتر ءَ بی این ایم ءُ دگہ ھمگرنچیں گلانی گوم ءَ گیش ھمگرنچ بیگ ءِ کول ھم کتگ-

بی این ایم ءَ ھمے ماہ ءَ جنیوا ءَ بلوچستان ءِ جیڑھانی درگت ءَ میان استمانی ھساب ءَ سرپدی دیگ ھاتر ءَ جوانیں سپارتی مھم برجاہ داشتگ کہ دانکہ دیم ماہ ءَ برجاہ بیت- اے مھم ءَ اکوام متھدہ ءِ جتاجتائیں باسکاں چہ گند ءُ نند بیتگ ءُ بلوچستان ءِ جیڑہ پدر کتگ اَنت-