بلوچ وائس فار جسٹس ءِ جارکش ءَ یک درشانے شنگ کتگ گْوشتگ کہ بیست یک ستمبر ءِ بیگاہ ھشت ءِ شپ ءَ بگر تاں شپ دوازدہ ءَ ایکس ءَ یک کمپینے برجم دارگ بیتگ، آئی مول گوستگیں دہ سالاں چہ زورانسری بیگواہ رفیق اومان ءِ پہ سلامتی یل کنائینگ ھاتر ءَ توار چست کنگ اِنت-
جارکش ءَ راج ءُ انسانی ھکانی سرجمیں باسکاں چہ دزبندی کتگ کہ آ اے مھم ءَ جوانیں وڑے ءَ بھر بزور اَنت ءُ رفیق اومان ءَ ھوار دگہ بیگواھیں مردمانی ھاتر ءَ توار چست بہ کن اَنت، رفیق اومان یک استادے کہ گوستگیں دہ سالاں چہ بیگواہ ءَ اِنت، آئی ءِ زورانسری بیگواھی ھزرانی نودربراں زانشتی تھاروکی ءِ تہ ءَ چگل دیگ اِنت-
درشان تہ ءَ گوشتگ کہ بیست ستمبر ءَ نامی ئیں راجدوستیں راھشون استاد واحد قمبر ءِ کھول نیمگ ءَ چہ آئی ءِ پہ سلامتی یل کنائینگ ھاتر ءَ ایکس ءَ شپ ھشت ءَ بگر تاں یازدہ کمپین برجم دارگ جار جتگ-
بلوچ وائس فار جسٹس کمپین ءِ سرجمی ءَ پلامرزی جار ءَ جنت- درشان ءَ گوشگ بیتگ کہ آ استاد واحد قمبر ءِ یل کنائینگ ھاتر ءَ برجم دارگ بیوکیں مھم ءَ آیانی ھمراہ ءَ اِنت ءُ اے تھنا یک کھولے واستا اناں بلکیں سرجمیں بیگواھیں مردمانی واستا انساپ ءِ جُھد بھر اِنت-
بلوچ وائس فار جسٹس ءِ جارکش ءَ انسانی ھکانی گلاں، سیاسی باسکاں، ءُ سول سوسائٹی ءِ سرجمیں پڑ مردماں گوں دزبندی کتگ کہ آ اے دوئیں کمپین ءَ بھر بزور اَنت دانکہ زورانسری آوار جنی ءِ ھلاپ ءَ یک مھکمیں کلوھے دات بہ کن اَنت- اے مھم مول سرجمیں جھان ءَ ھستیں مردماں بلوچستان ءَ برجاھیں انسانی ھکانی تُرندیں ھلاپ ءَ لگتمالی ءُ زورانسری آوار جنی ءِ جیڑہ درگت ءَ سرپد کنگی اِنت-
درشان ءِ تہ ءَ دیمتر ءَ گوشتگ کہ رفیق اومان ءُ استاد واھد قمبر وڑیں بے میاریں مردماں زورانسری بیگواہ کنگ اے کھولانی واستا یک بلاھیں دردناکی ءُ اے انسانی ھکانی بلاھیں ھلاپ ورزی یے – ھمے ھاتر ءَ سرجمیں پڑ ءَ گوں سیادی داروکیں مردماں دزبندی کن ایں کہ آ اے مھم ءَ وتی توار ءَ ھوار بہ کن اَنت ءُ انسانی ھکانی اے جیڑہ ءَ جھان دیم ءَ بیار اَنت-
جارکش ءَ گُڈی ءَ گوشتگ کہ بلوچ وائس فار جسٹس زورانسری بیگواھیں مردمانی ھاتر ءَ جُھد ءَ برجاہ دار اِیت ءُ اے مول ھاتر ءَ ھرچ پڑ ءَ توار چست کنت-