شال: بساک ءِ نیمگ ءَ بلوچی زبان ءِ نامی ئیں شائر مبارک کازی ءِ یات ءَ مراگشے برجم داشتگ

بلوچستان ءِ بنجاھی شھر شال ءَ بی ایم سی ءَ بلوچ اسٹوڈنٹس ایکشن کمیٹی ءِ نیمگ ءَ نمیرانیں مبارک کازی ءِ یات ءَ شال ءَ مراگشے برجم دارگ بیتگ –

مراگش ءَ لبزانکی تکاں ھواریں شائر ءُ نبشتہ کاراں بھر زرتگ ءُ مبارک کازی ءِ یات ءَ آئی ءِ ازم ءُ شائری ءِ سر ءَ بھر زیروکاں وتی وتی لیکہ درشان کتگ اَنت-

مراگش ءَ پروپیسر ءُ نبشتہ کار ڈاکٹر اے آر داد، براھوئی ءُ اردو ءِ نبشتہ کار ءُ پروپیسر منظور بلوچ ءَ ھوار ھوار نودربراں ھوار ھوار جنکیں نودربراں ھم بازیں کچے ءَ بھر زرتگ-

مراگش جتا جتائیں بھراں ھوار بیتگ کہ آئی ءِ توک ءَ شائری ، گشتانکی ءُ ساز ءُ زیملی بھر ھم ھوار بیتگ اَنت-

مراگش ءَ ڈاکٹر اے آر داد ءَ مبارک کازی ءِ درگت ءَ درشان کنان ءَ گوشتگ کازی وتی اھد ءِ مزنیں شائرانی لڑاں ھواریں شائرے بیتگ-

آئی ءَ گوشتگ کازی ھما شائر بیتگ کہ آئی ءِ گور ءَ بلوچستان بیتگ ءُ آئی ءَ بلوچستان ءُ آئی ءِ شائری ءِ سکین دراھیں شائراں ھوار بلوچ مھلوک وتی نیمگ ءَ سانمند کتگ اَنت-

آئی ءَ گوشتگ مبارک کازی ھرجاہ ءَ گون اِنت بلے مبارک کازی ءِ شائری ھرجاہ ءَ نیست اِنت – ءُ آئی ءَ گوشتگ مبارک کازی وتی کوھیں شائری ءِ تہ ءَ ھلاس نہ بیت بلکیں نوکیں دور ءَ آئی ءِ شائری ءَ نوک باھند سکین زیر اَنت-

دیوان ءَ پروپیسر ڈاکٹر منظور بلوچ ءَ گوشتگ مبارک کازی ءَ تھنا بلوچی زبان ءِ شائر سانمند نہ کتگ انت بلکیں آئی ءَ چہ براھوئی ءِ ھواریں شائر وتی نیمگ ءَ سانمند کتگ اَنت-

آئی ءَ گوشتگ مبارک کازی ءَ وتی شائری ءَ ریاست ءِ زوراکی وتی شائرانی انداز ءَ درشان کتگ ءُ مھلوک سرپد کتگ انت-

مراگش ءَ بازیں کساسے ءَ نودربراں ھوار ادیب ءُ شائراں بھر زرتگ ءُ مراگش ءِ گشتانکی بھر ءَ پد مبارک کازی ءِ ڈاکومنٹری یے پیشدارگ بیتگ ءُ پد ءَ دیوان ساز ءُ زیملی بیتگ-

ساز ءُ زیملی دیوان ءَ گشندھاں مبارک کازی ءِ شائری گشتگ ءُ دیوان وتی نیمگ ءَ دلگوش کتگ-

زانگ بہ بیت مبارک کازی ءِ نمیرانی ءِ اولی سالروچ ءِ درگت ءَ بلوچستان ءِ جتا جتائیں جاھاں دیوان ءُ شائری لیکہ برجاہ دارگ بیتگ اَنت-