روکپتی بلوچستان ءِ جتا جتائیں جاھاں ایرانی لشکر ءِ تیرگواریاں تیل کشیں دو مردم بیران بیتگ اَنت ءُ یکے ٹپی بیتگ –
ایرانی لشکر ءَ راسک ءَ تیرگواری کنان ءَ چریشی ءَ گاڑی چپ بیتگ ءُ تیل کشی ءَ ھواریں پانزدہ سالی ئیں ورنایے بیران بیتگ-
بیران بیتگیں ورنا ءِ پجار امیر مھمد داوودی ء جواد جھمنند پھرہ ءِ نام ءَ زانگ بیتگ-
اھوالانی رد ءَ گوستگیں روچ ءَ ایرانی مرساد ءَ راسک ءِ نزیک ءَ تیرگواری کتگ ءُ چریشی ءَ گاڑی چپ بیتگ ءُ گاڑی ءَ سواریں امیر بیران بیتگ –
ھمے ڈول ءَ راسک ءِ ھند جکیگور ءَ سیمسری ھند ءَ مرساد ءَ تیرگواری کنان ءَ یک مردمے کشتگ-
کُشگ بیتگیں مردم ءِ پجار بیست ءُ ھشت سالی ئیں اھمد آسکانی ء نیاز جھمنند مورتان راسک ءِ نام ءَ زانگ بیتگ –
ھمے ڈول ءَ بمپشت ءَ ایرانی لشکر ءَ تیرگواری کتگ ءُ یک مردمے ٹپی کتگ-
ٹپی بیتگیں مردم ءِ پجار مھران بلوچزئی ءِ نام ءُ زانگ بیتگ-