ریاست بلوچستان ءَ بندی جاہ جوڑ کنگ ءَ اِنت۔ ماہ رنگ بلوچ

ھکومت شھری، سیاسی کارکن ءُ آیانی سیاد ءُ وارسانی ناماں ناشرکاری ءِ نگرانی لسٹ ءَ ھوار کنگ ءَ ھکّانی جنگ ءَ را بند کنگ ءِ جھد ءَ انت۔ ماہ رنگ بلوچ .

بلوچ یکجھتی کمیٹی ءِ آرگنائزر ءُ سیاسی سروک ماہ رنگ بلوچ ءَ وتی ایکس اکاؤنٹ ءَ پوسٹ کتگ ءُ گْوشتگ کہ بلوچستان سرکار لشکری ​​اسٹیبلشمنٹ ءِ گْوشگ ءِ پد ءَ ھزاراں نام چارمی شیڈول ءَ ایر کنان ءَ مزنیں کچے ءَ منظمیں بدسلوکی کنگ ءَ اِنت۔

بلوچ رھشون ءِ اے گپ ھما وھد ءَ دیم ءَ اتکگ کہ صوبائی سرکار ءَ چار ھزار ءَ چہ گیش مردمانی نام چارمی شیڈول ءَ ایر کتگ ءُ گْوشتگ کہ آ گوں سلاھبندیں گل بی ایل اے ءَ ھمگرنچ اَنت۔

ماہ رنگ ءَ گُشتگ ایوک ءَ کوئٹہ ءَ جولائی ءَ 137 مردم چارمی شیڈول ءَ ھوار کنگ بوتگ انت کہ آیانی تہ ءَ نودربر، کماش، ادیب، لیکچرر ءُ پروفیسر ھوار انت۔

آئی ءَ گْوشتگ کہ سرکار ءِ نیمگ ءَ چہ شنگ بوتگیں لڑ ءَ منی برات نصیر بلوچ ھم ھوار اِنت کہ پیسر ءَ ھم زوراکیں بیگواھی ءِ آماچ بوتگ ءُ آئی ءَ گوں ھچ وڑیں سیاسی کارے ءَ ھچ سیادی نیست، یک امن ءُ ایمنی ءِ شھروندے یا جھدکارانی کھول ءِ مردمانی نامانی ھوار کنگ ءَ ناشرکاری ءِ ھلاپ ءَ چارگ ءِ لسٹ بلوچستان ءِ بلوچ راج ءِ سر ءَ سرکوب ءِ مزنیں مھم ءِ بھر اِنت۔

بلوچ رھشوناں گْوشتگ کہ سرکار بلوچستان ءَ یک مزنیں کچے ءَ بندیگ جاھے جوڑ کنگ ءَ اِنت، ھمے وڑیں چین ءِ وت واجھیں دمگ سنکیانگ ءِ جاور کہ آ بندی جاہ جوڑ کنگ بوتگ اَنت ءُ اے وڑیں کارروائیانی مول ءُ مراد ریاستی زُلم ءُ زوراکی اَنت۔ حقوق ءِ تواراں گیش ءُ گیوار کنت-

ماہ رنگ بلوچ ءَ دیمتر ءَ گْوشتگ کہ بلوچ اے وڑیں ھرچ کارے ءِ دیم ءَ اوشتات کنت، من چہ سول سوسائٹی، رسانکدر، میاں اوستمانی انسانی ھکانی گل ءُ سیاسی گلاں گوں دزبندی کن آں کہ آ کانود ءِ اے بے دروریں ناجائز کارمرز کنگ ءِ ھلاپ ءَ وتی توار ءَ چست بہ کن اَنت .