بلوچستان ءِ شھر مستونگ ءَ پاکستانی پوج ءِ بُنجاھی بُنجل سلاہ بندیں مردماں اُرش ءِ نشانگ کتگ-
مستونگ شھر ءَ ناشناسیں سلاہ بندیں مردماں پاکستانی پوج ءَ بُنجاھی بُنجل اُرش ءِ نشانگ کتگ، اُرش وھد ءَ بازیں تراکانی توار اش کنگ بیتگ-
دمگی اِھوالکار رِد ءَ تراکانی ھمراھی ءَ تُرندیں تیرگواری ءِ توار ھم اش کنگ بیتگ-
اُرش ءَ پد اُرشکار ناشناسیں جاھے ءَ تتکگ اَنت- واکدار ءَ اُرش ءِ درگت ءَ ھچ وڑیں درشان شنگ نہ کتگ-
زانگ بہ بیت مروچی اشی ءَ ساری مستونگ ءِ دمگ اسپلنجی ءَ پاکستانی پوج ءِ پیادگ کارمندانی سر ءَ بمب اُرش نشانگ کنگ بیتگ-
پوج کارمندانی سر ءَ تراک ھما وھد ءَ بیتگ وھدے آ دمگ ءَ پوجی لشکر کشی ءَ دلگوش بیتگ-
اے اُرشانی زمہ واری انگت ھچ گلاں نہ زرتگ اَنت-