کامریڈ پدائی نودان جان ءُ بلوچ آجوئی جُنز
نبشتہ کار: مراد درویش
دی بلوچستان پوسٹ
آجوئی جُنز ءَ وڑ وڑیں رنگ ءُ دروشم ءَ گندگ ءَ کیت کدی چو بیرگیریں بالاچ ءَ پہ دژمن ءَ نپت شانیت ءُ کدی چو کُنگریں اُستاد اسلم جان ءِ سُپاھیگ ءَ پہ دژمن ءَ شورھانی تراکاں آس دنت ءُ چُنڈ چُنڈ بیت ءُ بلوچستان ءِ مھروانیں ھاک ءَ گوں ھوار بیت ، کامریڈ پدائی نودان جان ھم بلوچستان ءِ ھما نہ شِکستیں ءُ باج بریں سرمچاراں چہ یکّے بیت کہ وتی نُگرھیں ارواہ ءَ پہ وتی ھانی ئیں سرڈگار ءَ ندریگ کنت ءُ کیچ ءِ دلبند ءَ گوں ھوناں سِنگاریت ءُ اَچ ما رُکست بیت ، کامریڈ نودان بلیدہ ءَ کورے پُشت ءَ رُستگ ءُ مزن بوتگ اَت سکّیں مھروانیں انسانے اَت مدامی دپ ءِ کندگ ءَ پُر اَت ، کامریڈ سکّیں گریبیں ءُ تنگ دستیں لوگے ءَ رُستگ ءُ لاھک بوتگ اَت بلئے ھو وھد ھرچ انسان ءِ گوز ایت مستریں شُد لاپ ءِ نہ اِنت بلوچ گُلامی ءَ جَتگ بلئے کامریڈ ءِ شیرزالیں مات ءَ ھزاراں دروت کہ نودان جان ءِ وڑیں کنگریں بچّے ئے مات اِنت ءُ نودان مدامی مات ءِ لاڑک اَت آئی ءِ مات ءِ میتگے درستیں سنگت کہ نودان ءِ ھست اِتاں درستاں چو مات ءُ چُکّ ءِ وڑا مھر داتگ اَنت پہ لاڑکی وتی سالونکیں بچّ ءِ رودینتگ اَت ، چُک وَ ھمک مات ءَ دوست اِنت بلئے کامریڈ ءِ مات ءَ زانتگ اَت کہ کامریڈ ءِ وتی ماتیں سرڈگار ءِ مھراں گیشتر شیداہ کُتگ گُڑا آئی ءَ پہ دل ءُ جان آجوئی جنز ءِ راہ گِچین کُتگ اَت ءُ کامریڈ ءَ پہ بلوچستان ءِ آجوئی جنز ءِ مزن ءُ لاھک کُتگ ءُ کامریڈ پد ءَ بلوچستان ءِ سپاھیگے جوڑ بوت ءُ پہ سرزمین ءَ داں گُڈُی تیر ءَ جنگے داشت ءُ وت ءَ راجدپتر ءِ تاکاں نمیران ئے کُت چُشیں سرانی دیمونی ءِ درچ داں آجوئی ءِ روچ ءَ گوں کندگاں برجاہ بیت ءُ کامریڈ ءِ پیمیں نمیرانیں سر داں بلوچ ءُ سرڈگار بلوچستان مانیت راجدپتر ءِ تاکاں اَبدمان بنت-
من ءَ یات اِنت ھما زمانگ ءَ کہ بی ایس او آزاد ءِ سنگت گراونڈ ءَ کارا اِتاں گُڑا تُربت ھنکین ءِ جوانتریں باسک یکے نودان اَت کہ بلیدہ ءِ سنگتانی سیاسی چست ءُ ایر ءِ وتی کوپگاں زُرتگ اَت ، سنگتانی سیاسی ھیلکاری ءَ بگر داں آشوبی چِست ءُ ایراں بیا ، سرجمی ءَ یک اُستادت یک راھشونے اَت ءُ پہ ھکّ ءُ دل گَل ءِ پروگرام ءُ کارانی توک ءَ جُنزگ ءَ اَت ، دو ھزار ءُ ھبدہ ءَ وھدے دژمن ءِ چیریں اِداراھانی کارمند ءُ پاکستانی پوج کامریڈ نودان ءَ پہ زورانسری بیگواہ کن اَنت داں پُریں دو سال ءَ کامریڈ دژمن ءِ زندان ءَ درد ءُ تورشتانی توک ءَ بیت ءُ پد ءَ آجو بیت دژمن ھمے سرپد بیت کہ آزار ءُ درد دیگ ءَ رند نودان جان من پروش داتگ بلئے کامریڈ اَنگت وتی بلوچ راجی کاز ءُ بلوچ ءِ جنگ ءَ چہ دست کَش نہ بیت ءُ گیشتر توانا ءُ مھکم تِر بیت ءُ دیم پہ سلاہ بندیں گَل ءَ ھوار بیت ءُ پہ وتی ھانی ئیں زمین ءَ سرجمیں جنگولے جوڑ بیت ، درستیں واھشتاں کُش ایت ءُ بس یکیں واھشت کہ من ءَ پہ زمین اَبدمان بوھگی اِنت پہ ھمے واھشت ءَ مدامی جنگ کنت ءُ دژمن ءَ بدنام کنت ، کدی پروم ءُ زامران ءِ کوھاں گُّا کدی بلیدہ ءُ بالگتر ءُ ایدگے کیچ ءِ کوھی دمگاں بچار گوں گَل ءِ کاراں سر ءُ چیر اِنت ھمے نودان اِنت کہ مدامی بچار بس جنگ ءَ اِنت ، بس درستاں پیسر وت ساڑی اِنت ، گُشی بندات ءَ من دژمن ءَ لٹ دیاں ، ”سنگتاں کَلاگ گِپت کہ تو اِدا چے کن ئے بُرو پدائی ءِ بکن ءُ مدام کامریڈ ءَ کند اِت ءُ ھمے پسّہ دات من پہ زمین ءَ ھما روچ ءَ پدائی بوتگاں کہ من کوھاں درکپتگاں“ واکی کامریڈ ءَ پدائی کُت پہ وتی ھانی ئیں زمین ءِ رکّینگ ءَ چو ریھان جان ءَ سالونک بوت ءُ ڈیھے امباز کُت-
وھدے کہ تو بلوچستان ءِ زیبائی ءَ سما کن ئے ءُ پد ءَ زمین ءِ مِھر ءِ گپ بیت گُڑا ھر چاریں نیمگاں ترا نودان دست کپ اَنت کہ پہ زمین ءَ اِشاں وتی ساہ داتگ اَنت ، زمین ءِ اَنچیں مِھرے کہ آئی ءِ دیم ءَ اِنسانی جانانی کربان کنگ پہ ما یک وشبھتی یے ، من گُشاں کجام وشبھت بہ بیت کہ گوں جند ندریں ارواہ ءَ وت ءَ پہ زمین ءَ نمیران بکنت وتی جان ءِ اَرچ ٹُکر ءَ گوں زمین ءِ ھاکاں ھوار بکنت ، دنیا ءِ آجوئی جُنز بوتگ اَنت بلئے بلوچ ءِ آجوئی جُنز ھما رنگ ءَ زیبا ءُ توانا اِنت کہ سرجمیں کاھنات ھبّکہ اِنت کہ چونیں سالونکیں سراں پہ کندگ پہ جزبگ رواں دژمن ءِ بُنجلاں پُتراں ٹھک دیاں ءُ وتی جند ندریں مارشتانی تیراں پہ دژمن ءَ اَنگر کن اَنت ، چونیں زیباھیں سر اَنت کہ پہ شانے وتی ملگزاریں زمین ءِ سالونک بنت ءُ واتر بنت ، بلوچ ءِ جُنز ھمنچو زیبا اِنت ، کیچ ءِ دلبند ءَ کوش لھم لھم ءَ شیکّگ ءَ اَت چار زمین زادگ پہ گَلے پہ وتی بانوریں بلوچستان ءَ سالونک بوھگ ءَ رھادگ اِتاں ، دیر دیر ءَ یک پَٹّکیں ءُ جوانمردیں کوھگردے کندگانی توار اَت ٹھک دیاْن اَت ءُ گوں تیر ءُ شورھاں دژمنیں پاکستان ءِ نے وی کیمپ ءَ پُترگ ءَ اَت ھمے ساھتاں گُش ئے سرجمیں بلوچستان ءَ آجوئی ءِ مستاگی شنگ اَت ھرچ بلوچ ءِ گَل ءَ بال اَت کہ مرچی کیچ ءَ دژمن گوں سرمچاراں دیم پہ دیم اِنت رسواہ اِنت ، دیر مات ئے وتی سالونکیں بچّ ءِ ودار ءَ اَت کہ ساھتے ءِ پیسر جنگ ءِ بندات کُتگ اَت ھمے پَٹّکیں ءُ جوانمردیں کوھگرد کامریڈ نودان جان ءَ کہ گوں سرمچاریں ھلیپ جان ءُ نہ تُرسریں پدائی مُراد جان ءُ کمانڈر دودا جان ءَ ھوار گوں بے پِتیں پاکستانی فوج ءَ داں سُھب ءَ جنگ دیان اَت ھر دمان تیر ءُ شورھانی توار اَت ءُ ھر دمان بلوچستان بچکندگ ءَ اَت ءُ گل ءَ بال اَت کہ مرچی آئی ءِ سالونک اَبدمان بوھگ ءَ اِتاں ، کامریڈ ءَ وتی سرچست کُتگ اَت پہ بلوچ سرڈگار ءِ گُلامی ءَ جھد ءَ اَت ءُ پد ءَ چُش بوت کہ کامریڈ ءَ داں گُڈّی تیر ءَ جنگ داشت ءُ نمیران بوت ءُ جسمانی ھوالہ ءَ اَچ ما جتا بوت بلئے پگری ھوالہ ءَ راجدپتر ءَ داں اَبد وت ءَ نمیرانے کُت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔