بُرزبالادیں بلوچاں
نبشتہ کار: سنگت ھکیم
دی بلوچستان پوسٹ
تو بلکیں کمّو ھیران بہ بے من ترا بھ بلوچاں ءِ نام ءِ سر ءَ توار نہ جتگ بلے مرچی باریں پہ چونی ترا بلوچاں گوشگ ءَ آں ، تئی مدام واھشت بوتگ کہ تو بلوچان ءِ نام ءِ سر ءَ زانگ بہ بے بلے بیا کہ مرچی من ترا ھال دیئگ لوٹاں کہ انسان ءِ گیشیں واھگ پیلو نہ بنت ۔ اڑے بلوچاں تو من ءَ چہ گیش سرپدے چیا کے تو لوٹ اِتگ ات کہ تو بلوچستان ءِ کوھانی توک ءَ بہ مرے بلے سرجم نہ بوت البت تو پہ بلوچستان ءَ الّم مرت ئے من زاناں ترا وت ءَ چُشیں مرگ وش نہ بیت بلے زندے ھر پڑ ءَ تو برداشت کُتگ اوپار کُت ءُ مھکمی ءَ اوشتگ ئے انوں ھم کن ئے۔
اڑے ترا یات انت من تو بارکان ءَ پہ تَر ءُ تاب ءَ شُتگ اتیں ءُ کوھانی توک ءَ گردگ ءَ اتیں من ترا گُشت یار استان ءَ مئے کُلیں چیز بُرتگ انت بس کوہ پشگیتکگاں، انچو گِران انت کہ اِیشاں ھرچوں بکنت بُرت نہ کنت تو گُشت دِگہ ھم چیزے ھست کہ آئی ءَ ھم بُرت نہ کنت من جُست کُت باریں بہ گوش چی؟ تو پسو دات۔۔۔! Dying as Free man- اڑے بلوچاں تو آجوئی مرگے کُت یار من گُشاں اگاں بنی آدم ءَ ایردستی ءِ بیمناکی مار اِت گڑا آجوئی ءِ سپر چہ ھمودا بندات بیت تو بلے چہ درکسانی ءَ مار اتگ ات تو کسانی ءَ بگر داں ورنائی ءَ سرجم ءَ آجو ات ئے۔ تو پروم ءَ کہ اولی رند ءَ چم پچ کُتاں تاں دیست زمین جنگاں گپتگ ۔ تئی گوشاں اولی رند ءَ آشوبی اوگاماں جاگہ کُت ۔
لائک ءُ مزن بوت ئے گڑا تو وتی کساس ءَ چہ گیش کار کُت تو مُدام سنگتانی سیاسی ھیلکاری کنگ ءَ اِت ئے بلوچ راج ءُ نودربرانی ھاترا مدام کوکار ءُ توار چست کنگ ءَ اِت ئے۔
تو کتاب بھر کنگ ءَ اِت ئے، تو ھرکسی کِرا شوت ئے پہ سوگاتی کتابے الم بُرت گوںھماھند ءُ دمگاں کہ تو وانگ ءَ اِت ئے مرچی اگاں کسانیں سیاسی سِنچ یے مان ایت من پہ ستک گُشاں تئی برکت انت تئی جند یک شیواریں سیاسی ورناھے ات مدام سیاست چہ زات ءَ گیشتر ارزشت دات بلکیں تو بہ جیڑے منی روگ ءَ رند منی کار اوشت ءِ آماچ باں، اِناں بلوچاں ترا راج ءَ وتی کُتگ تئی کاراں ھم بلوچ ورنا دست گر انت-
تو کُجا کہ دمان ئے نشتے تئی گپ ءُ ھبر سیاسی سِنچ، نودبر گل بلوچستان ءِ توک ءَ سیاسی تنطیم ءُ، آشوبی گلانی ارزشت ءُ زلورت ۔ تو یک تچک ءُ نیک نیت ایں سیاسی سنگت اِت ئے۔ ترا سیاست ءِ نام ءَ ناں مزدوری دوست بوت ءُ ناکہ وت گلاھی تو مدام پریکٹکل بوھگ ءِ سر ءَ بھروسہ کُتگ ات ، تو سیاست پارٹ ٹائم ءِ ھاترا اناں بلکیں پہ مُجّتی وتی توک ءَ جاگہ داتگ ات۔
تو مدام ھمے گپ کُت کہ اگاں مرچی بلوچستان ءِ توک یک گونڈلے گیر سیاسی انت ایشی زمہ وار ھما انت کہ پہ بلوچ ءَ سیاست کنگ ءَ انت ترا دو روچی ئیں کار ھچ دوست نہ بوت تو کار پہ وت نہ کُت بلکیں پہ بلوچستان ءُ بلوچ راج ءَ کُت ایشی ءَ ھوار تو وتی نپری زمہ واری ھم زانتگ ات انت ءُ شوکیں وڑے ءَ پیلو کنگ ءَ اِت ئے۔
بلوچاں! تو یک گُمنامیں سیاسی ورناهے ات ئے تو وتی هدّ ءَ چہ گیش کُت من ترا باز رند ءَ مکن ھم کُت من مرچی ھم نزاناں پرچا بگندے منی وتی لگوری بہ بیت یا گون تو مھرے زوراکی بلے تو کہ چیزے جیڑ اتگ اَت ترا پد ءَ کئے ءَ بداشتیں ، تئی دلیری ءُ نہ ترسی ءِ سر ءَ من ءَ ھما وھد ءَ پکر ات مرچی ھم پکر اِنت۔
منی کوہ بالاد تئی کسان اُمری ءُ مزن پگری ءِ گواھی من ءَ چہ گیش ھما ورنا دینت کہ تو پہ مھر درس داتگ ءُ رودینتگ انت من ءَ پھل کن من تئی سر ءَ نبشتہ کُت نہ کناں ، من ءَ سما بیت منی لبز گون تو انساپ کت نہ کن آں۔
بلوچاں منی ایمان انت تو ھرکُجائے ھمود ءَ ھم پہ بلوچ ءَ کوکار کنگ ءَ ئے سیاست ءُ پروٹسٹ کنگ ءَ ئے۔
آجو بات ئے بلوچاں-
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔