بلوچ ءُ پاکستان ءِ سیادی ؟
ٹی بی پی شونگال
بلوچستان ءَ دو جتائیں پگراں گوں بندوکیں پاٹی راجدوستیں راجکاری ءَ گوں بندوک اَنت۔ غوث بخش بزنجو ءِ پگر ءَ گوں بندوکیں پاٹی پاکستان ءِ بنجاہ ءِ بھر جوڑ بیگ ءُ بلوچ جیڑھانی گیواری ءِ لوٹوک اَنت۔ خیربخش مری ءِ پگر ءَ گوں بندوکیں گل چہ پاکستان ءَ آجوئی ءَ بلوچ راج ءِ رکینگ ءُ راجی ھستی ءَ برجاہ دارگ ءِ وڑ سرپد بنت ءُ چہ دو دھکاں بلوچستان ءِ آجوئی ءِ جنگ ءَ دیم ءَ برگ ءَ اَنت۔
بلوچ راج ءِ دویں تکانی پگر ءَ گوں سیادی داروکیں رھشوناں جتائیں وھداں راجی اگبالانی گرگ ءِ ءُ پہ آجوئی ءَ جھد برجاہ داشتگ بلے نوزدہ سد ءُ ھپتاد ءِ دھک ءَ نیشنل عوامی پارٹی ءِ سرکار ءِ ھلاس کنگ ءُ بلوچ رھشونانی بندیگ کنگ ءَ پد زندان ءِ تہ ءَ وتی راہ جتاہ کُتگ اَت اَنت۔ غوث بخش بزنجو ءَ پاکستان ءِ فیڈریشن ءِ تہ ءَ نندگ ءُ بلوچ اگبالانی گرگ ءِ سیاست ءِ برجاہ دارگ ءِ پیسلہ کُتگ اَت وھدیکہ خیربخش مری ءَ پاکستان ءِ پارلیمانی سیاست ءَ بے مُز نامینتگ اَت ءُ بلوچ راجی آجوئی ءَ جیڑھانی گیواری نامینتگ اَت ءُ وتی زندمان بلوچ جنگ ءِ مھکم کنگ ءِ تہ ءَ گوازینت۔
بلوچستان ءِ زورانسری ھواری ءَ گوں بلوچ ءُ پاکستان ءِ سیادی زوراکی ءُ باجگری ءِ بنیاتانی سر ءَ بندوک اِنت۔ اگبال ءُ آجوئی ءِ جُنزاں چہ گوستگیں ھپت دھکاں گوں تاکت ءِ زور ءَ ھلاس کنگ ءِ جھد بئیگ ءَ اِنت کہ چریشی ءَ بلوچستان ءَ ھمے ھیال مھکم بیتگ کہ بلوچستان ءُ پاکستان ءِ سیادی فیڈریشن ءَ گیشتر یک کالونی ءِ ئیگ انت کہ ایشی ءَ برجاہ دارگ ءِ ھاتر ءَ یکشلیں زوراکی ءُ شدت ءِ کمک زیرگ بئیگ ءَ اِنت۔
بیست ءُ یکمی کرن ءَ بلوچ ءُ پاکستان ءِ نٹاھی گیشتر بوتگ اَنت ءُ راجی آجوئی ءِ جُنز بلوچ مھلوک ءِ تہ ءَ نامدار بوان بیت، کہ ایشی ءِ ھلاس کنگ ءِ ھاتر ءَ پوجی زورشاہ جنرل پرویز مشرف ءَ بیھار دیان ءَ گُشتگ اَت کہ ما آیاں ( بلوچاں) چہ ھموداں جنیں کہ آیاں سما ھم نہ بیت، ایشی ءِ پسہ ءَ خیر بخش مری ءَ گُشتگ اَت کہ ما ھم ھپتاد ءَ دھک ءِ بلوچ نہ اِنت، ما پاکستان ءَ ھمائی ءِ زبان ءَ پسہ دئیں۔
جنرل مشرف ءِ اھد ءَ چہ جنگ ءِ دارگ ءِ پالیسیانی سر ءَ کار بندات بیتگ اَت چریشی ءَ بلوچستان ءَ ھلاس نہ بیوکیں زوراکی ءُ باجگری ءِ بندات بیت کہ گوستگیں دو دھکاں چہ برجاہ اِنت ءُ بلوچستان ءَ چُشیں لوگ باز کم بنت کہ کہ آ ڈیھی زوراکیاں چہ اسرمند مہ بنت۔ ڈیھی زوراکیاں چہ لس گھگیری ودی بیتگ انت کہ جتائیں دروشماں برجاہ اَنت ءُ بلوچستان ءِ مھلوک ھمے ھیال ءِ درشانی ءَ کنگ ءَ اَنت کہ پاکستان ءُ بلوچ ءِ سیادی زوراک ءُ ایردست ءِ ئیگ اِنت۔ انیگیں سیاسی چِست ءَ ھمے ھیال مھکم کُتگ کہ پاکستان ءِ پارلیمانی رھبند ءِ تہ ءَ بلوچ جیڑھانی گیواری باوری نہ اِنت ءُ تھنا گھگیری ءَ گوں بلوچ راج وتی اگبالاں گِپت کنت۔