نبشتانک: زِر منی جنک ءَ گوات ءَ بِدے!
نبشتہ کار: سلال سمین
دی بلوچستان پوسٹ
زِر ! منی جَنِک ءَ گوات ءَ بِدے کہ منی جَنِک ءَ را زمین ءِ زیبائی ءِ بنگانی ملاراں گِپتگ ، منی جَنِک زمین ءِ زھیرانی زیمراں گوں سوت گُش اِیت ، منی جَنِک روزردے ءِ شینکانی ھمراھی ءَ پہ زَر اِیت ، منی جَنِک گواتے ءِ ھمراہ بُوگ لُوٹ اِیت اِنت ، منی جَنِک زیدانی اندر ءَ پاد شپاد ءَ گردگ لُوٹ اِیت ، منی جَنِک گواڑگانی گوناپ ءَ سینگار کنگ لُوٹ اِیت ، منی جَنِک چِراگانی ارواہ ءَ بالوانی بانزُلاں کنگ لُوٹ اِیت ، منی جَنِک جنگجاھے ءَ وتی بانُوری ءَ چکّاسگ لُوٹ اِیت ، منی جَنِک دُودانی سانکلاں پُروش دَیگ لُوٹ اِیت ، منی جَنِک مھر ءِ امبازاں بُوگ لُوٹ اِیت ، منی جَنِک شورھانی گرمیں بدن ءِ بُوسگاں لُوٹ اِیت ، منی جَنِک جمبراں گوں سپر کنگ لُوٹ اِیت ، منی جَنِک ماہ ءِ کش ءَ نِندگ لُوٹ اِیت ، منی جَنِک اِستالانی لنکُکاں وت ءَ کماھگ لُوٹ اِیت ، منی جَنِک رولہ ءِ دستاں گِرگ لُوٹ اِیت ، منی جَنِک وتی اندر ءِ مردُم ءَ مارگ لُوٹ اِیت ، منی جَنِک وتی زیبائی ءَ سما کنگ لُوٹ اِیت ، منی جَنِک گوات ءِ سریگ بُوگ لُوٹ اِیت ، منی جَنِک ءِ آجوئی ءِ شھمے بُوگ لُوٹ اِیت ، منی جَنِک اے اِشک چکاریں لِزتانی ھُوشام ءَ لُوٹ اِیت اِنت ، منی جَنِک جِندندرانی دُروشُم ءَ گوں بال کنگ لُوٹ اِیت ، منی جَنِک اے کوہ ءُ اَگاراں گوں لئیکو جنگ لُوٹ اِیت ، منی جَنِک شانتُلانی زُبان ءَ زھیرونک جنگ لُوٹ اِیت ، منی جَنِک مھروانی آساپ بُوگ لُوٹ اِیت ، منی جَنِک ھانی ءِ کِسّہ ءَ نُوک کنگ لُوٹ اِیت ، منی جَنِک ریھانے ءِ سمّو بُوگ لُوٹ اِیت ، منی جَنِک زمین ءِ بانُور بُوگ لُوٹ اِیت ، منی جَنِک تیرانی گونڈلیں توار ءَ گوں ساہ دیگ لُوٹ اِیت ءُ منی جَنِک آجو بُوگ لُوٹ اِیت ۔
بلے زِر ! منی جَنِک درامدے دیارے ءَ نِشتگ مُلور اِنت ، بے چاڑ اِنت ، زھیریگ اِنت ، ارسیگ اِنت ، بے تاھیر اِنت ، بے زیمر اِنت ، بے سُوت ءُ گزل اِنت ، بے واھشت اِنت ، مِھروانیں مردُمے نیست ، درامدانی جاک ءُ کوکارانی تھا اِنت ، بے سما ءُ بے پِگر اِیں مردُمانی تھا اِنت ، مُلورے روزردے ءِ دیدگاں گَرد اِیت ، ابیتکیں دیوالانی سرا نِبشتہ کُرتگیں لبزاں چار اِیت ، گُٹ گیریں ساھتانی درداں مار اِیت ، شپانی پاساں چہ واب ءَ گُڑ اِیت ، مارِشتانی زگریں زھراں شان اِیت ، بے مِھری ئے زنگ ءَ جنت ، بے وانکی ءِ درا نِشتگ ، لُوگ ءِ درامدیں کارِستانی شِگاناں سگّ اِیت ، دُوتُوکے ءَ گوں لئیب کنت ، زِیبداریں پُوشاکانی رنگاں مٹّین اِیت ، سَھت ءُ تِلاھانی زیبائی ءَ گوں وت ءَ نہ سینگار اِیت ، اجگیں جنین زھگی ئے مولُماں آس دنت ، باتِن ءِ تِج گِپتگیں اندوھاں گوں کْوار بند اِیت ، موسُمانی بھاراں رنجین اِیت ، گوات ءِ چمّاں ھاک مان ریچ اِیت ، سُرمگیں نِگاھاں ارس بادین اِیت ، نپس گیریں گیرانی ٹپّاں وتی بدن ءَ جاہ دنت ءُ ارواھے ءِ گیمُرتگیں پنّاں گوات ءِ دستاں دنت اِنت ۔
زِر ! منی جنِک مُدام تئی ارواہ ءَ جیڑ اِیت ، تئی تیاب ءِ لمباں وھدے کئیت اِنت ءُ نِند ایت گُڑا آئی ءَ را گُشے ارواہ ئے ماں بیت ، آئی ءِ لُنٹ لپرز اَنت ، آئی ءِ دیدگ ارس شلین اَنت ءُ آئی ءِ دیدگ ترا وانگ بِندات کن اَنت ۔
زِر ! منی جنِک ترا مُدام گُش اِیت کہ او منی مِھرانی زِر ، او منی واھگانی سالونک ، او منی ماہ بدن ، او منی زیبائی ءِ درپشناکیں چِراگ ، او منی دیدگانی روک ، او منی زِند ءِ مُجتی اِیں مِھر ، او منی سپر ءِ ھمسپر ، من ءَ وتی بوجیگ ءَ سوار کن دُور چہ اِے دیار ءَ بِہ بر ، وتی چولانی ارواہ ءَ منی اندر ءَ مان بِکن ءُ بِل کہ منی بالاد گوں تُو لُڈّان کنت ، من ءَ وتی جُھلانکی ئے میار ءَ بِکن ، من ءَ وتی ماہ ءِ جیگی ءَ اڑین ، من ءَ مُساپِرے بِکن وتی ، من ءَ زِر نُوشے بِکن ، منی اندر ءِ آس ءَ وتی بِکن ءُ من ءَ پہ ٹھل ءُ نازے وتی بانُور بِکن ۔
منی زِر ! من ترا گُشگ لُوٹاں کہ منی جَنِک ءَ گوات ءَ بِدے بِلے کہ منی جَنِک ءِ ارواہ شاد بیت اِنت ، چو بُلبلے ءَ گلا بال بیت اِنت ، وتی زمین ءِ منگیراں کئیت اِنت ءُ وتی چموکیں بالاد ءَ گوں ماھے ءِ ھمراہ بیت اِنت ۔
منی زِر ! منی جَنِک ءَ گوات ءَ بِدے گوں شپانی ھامُوشی ءَ منی جَنِک ءَ بُوجیگے ءَ سوار بِکن ، چولاں وتی راز دار بِکن ، منی جَنِک ءِ زُلپاں شِنگ اِیں ، منی جَنِک ءِ بِچکندگاں وتی بِکن ، منی جَنِک ءِ دیدگاں بُوس ، منی جَنِک ءَ گوں باُنوری داباں بِہ سینگار ، منی جَنِک تئی جُھلانکی ءِ میار اِنت ، منی جَنِک تئی ارواہ ءِ زیبائی اِنت ، منی جَنِک ھما ماہ زمین اِنت ءُ منی جَنِک ءَ تُو بیار منی زمین ءِ ارواہ ءَ سر بِکن ۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔