تربت ءَ زھرشانی نندانک
ٹی بی پی شونگال
تربت ءَ بالاچ ءِ پولیس ءِ دروگیں میڑ ءَ کوش ءِ بگیری ءَ زھرشانی ننداک چہ بازیں روچاں برجاہ اِنت، کہ ایشی پلامرزی ءَ بلوچستان ءُ پاکستان ءِ جتائیں شھرانی تہ ءَ زھرشانی بئیگ ءَ اَنت ءُ زھرشانی، جُنز ءِ دروشم زیران اَنت کہ ایشی تہ ءَ پولیس دروگیں میڑاں کُشگ بیتگیں مردمانی کھول، گولڈ سمڈ کِشک ءِ سر ءَ فرنٹئر کور ءِ دست ءَ زوارکی ءِ آماچیں مردم ءُ مزنیں کچے ءَ زورانسری بیگواھیں مردمانی کھول ھوار اَنت۔
پاکستان پیپلز پارٹی ءِ سروک ءُ مسلم لیگ نون ءِ رھشون گچین کاریاں پہ چِن ءُ لانچ کنگ ءَ پہ شال ءَ وتی جریدگ اَنت ءُ بلوچستان ءِ جیڑھانی گیوار کنگ ءِ باوری دیگ ءَ اَنت بلے دروگیں پولیس میڑانی بگیری ءَ تربت ءَ برجاھیں نندانک ءُ اسلام آباد ءَ زورانسری بیگواھیں مردمانی یل کنائنگ ءَ پہ زھرشانی ءَ نشتگیں کھولاں انساپ دیگ ءِ ھاتر ءَ گپ کنگ ءَ پہ ساڑی نہ اَنت۔
ڈیھ ءِ بلوچ انسرجنسی ءِ ھلاس کنگ ءِ ھاتر ءَ اڈ داتگیں شوربندی بے سوب بیتگ اَنت، ھواریں سزا، زورانسری بیگواھی ءُ دروگیں میڑانی تہ ءَ مردمانی کُشگ ءَ چہ جُنز ھلاس کنگ نہ بنت ءُ بلوچ جیڑہ ءِ گیوار کنگ ءَ ابید بلوچستان ءِ تہ ءَ برجاھیں جنگ ھلاس نہ بیت۔
وائس فار بلوچ مسنگ پرسنز ءِ رد ءَ دو سال ءِ وھد ءِ نیام ءَ بلوچستان ءِ جتاجتائیں دمگاں چہ دو سد ءَ چہ گیشتر مردم زورانسری بیگواھی ءِ آماچیں مردم پولیس ءِ ناشرکاری ءِ بگیرکاریں تک ءِ دست ءَ دروگیں میڑانی تہ ءَ کُشگ بیتگ اَنت۔ دروگیں پولیس میڑاں کُشگ بیتگیں مردمانی کھول یکشلی ءَ گوں زھرشانی کنگ ءَ اَنت ءُ بالاچ ءِ ابید چہ آمیدگسی پرمان ءَ کوش ءِ بگیر ءَ ھزارانی کچ ءَ مھلوک ءَ تربت ءِ زھرشانی ننداک ءَ بھر زُرتگ۔
بلوچستان ءَ ڈیھی زوراکی ءُ زلم ءِ سوب ءَ مھلوک ءِ اوپار چہ سیمسراں گوستگ ءُ اگاں دروگیں میڑانی تہ ءَ زورانسری بیگواھیں مردمانی کُشگ ءِ درچ دارگ نہ بیت گُڑا اے زھرشانی جُنزے دروشم ءِ زرت کنت کہ چریشی ءَ بلوچستان ءِ تہ ءَ ریاست ءَ پیسر ءَ چہ دیمپانین جیڑھانی تہ ءَ گیشتر ترندی کئیت اِنت۔