نبشتانک: بلوچ ءِ زندمان
نبشتہ کار: درپش بلوچ
دی بلوچستان پوسٹ
بلوچ ءِ زندمان یک ھزابے جوڑ بوتگ بلوچ بوھگ یک گُناھے جوڑ بوتگ. مرچی اگاں دُنیا ءِ کُجام ھم کُنڈ ءَ یک بلوچے نِشتگ بزانکہ آ ھمے ھزاب ءِ آس ءَ سُچگ ءَ اِنت چُشیں بلوچے نیست کہ آ پشت کپتگ آ اے ھزاب ءَ نہ گِپتگ یا گْوزگ ءَ نہ اِنت کسان بہ بنت یا مزن جنین بہ بنت یا مردین کس نہ بچِ اِتگ، آ اگاں لوگ ءِ توک ءَ اِنت شر یا راہ ءُ سپرے ءَ اِنت شر یا ھاسٹل ءُ یونیورسٹی ءَ اِنت شر ھچ کَسی دل لاپ ءَ نہ اِنت آ کُجام ھم وھد ءَ چست کنگ ءُ گار کنگ بیت یا کُشگ ءُ دور دیگ بیت اِنت –
ھئیر بلوچ ءِ زندمان ھمے وڑ ءَ روان کنت داں گُلامی ھست اِنت-
بلے ھمے وتگڑیں پارلیمنٹ پرست کہ چہ ووٹ ءُ الیکشن ءَ در نیا اَنت مُدام بگندئے ھمے گِر ءُ چیل ءَ انت وت ماں وت جَنگ اَنت یکے گُش ایت نیشنل پارٹی یکے گُش ایت بی این پی مینگل یکے گُش ایت پیپلز پارٹی یکے گُش ایت باپ پارٹی ءُ یکے مات پارٹی بلے من اجب ھیران آں کہ ھاکر اے پارٹی ءُ ووٹ ءُ الیکشناں مارا داتگ چے ؟ اگاں مردم ووٹ ءَ پاد کئیت ءُ ووٹ لوٹ ایت ءُ گِپت کُجام وادہ ءِ پُشت ءَ بلوچ ھوام کہ ووٹ دنت ءُ ھمے لیڈراں کامیاب کنت پہ کُجام اوست ءُ اُمیت ءَ؟ ھمے مردم کہ سُھب داں شپ بس ووٹ الیکشن ووٹ الیکشن کن اَنت ھمے کمو بہ جیڑ اَنت ءُ ھیال بہ کن اَنت کہ اینچو وھد ءُ سال بیت کہ ما ووٹ داتگ ءُ اے وتگڑیں پارلیمنٹ پرست کامیاب کُتگ اَنت اے لُچ ءُ لگوزیں پارلیمنٹ پرستاں کجام شریں کار کُتگ پہ مارا ؟ اے ووٹانی پُشت ءَ کُجام پائدگ دیستگ ما ؟ مئے میتگ ءَ نہ شریں اسکول ءُ ٹیچر ھست نہ شریں ھسپتال ءُ ڈاکٹر ھست اگاں اسکول ھست گُڑا ٹیچر نیست اگاں ٹیچر ھست گُڑا آ آسراتی نیست اَنت کہ یک نودربرے ءَ اسکول ءِ تہ ءَ زلورت بنت ءُ نئیکہ مئے میتگ ءِ ھسپتالاں ڈاکٹر ھست دوا گولی ءُ آدگہ آسراتیاں بِل ھمے گیس کہ چہ مئے وتی وتن ءُ سرزمین ءَ در کیت آ ھم مارا رسگ ءَ نہ اِنت اگاں مئے براتے یا کماشے کوہ ءُ کوراں دارے چِنت ءُ بھا کنت آ بزان دزگیر کنگ ءُ بیگواہ کنگ بیت ءُ دروگیں بُھتام جنگ بیت کہ دھشتگردے بوتگ یا ھمود ءَ کُشگ ءُ دور دیگ بیت کہ پلاں میڑ ءَ جنگ بوتگ اگاں مات ءُ گوھارے بُہ روت پہ دار ءُ پیشّ ءَ کوہ ءُ کوراں گُڑا آیانی سرا ھم تیر گواری بیت ءُ مارٹر گولہ آس دیگ ءُ شبید کنگ بنت-
بلوچ نودربر کہ پہ اِلم ءِ وانگ ءُ زانگ ءَ ھر کُجا کہ بُہ روت آ ھم ھمے وڑ ءَ زلیل ءُ کوار اِنت اگاں انگت ما ءُ شُما بہ ننداں ووٹ بدیاں اے کاسگ چٹیں وزیر ءُ گزیراں کامیاب بکناں گُڑا اے شھیدانی ھون مارا نہ بکش انت مارا مئے آؤکیں پدریچ نہ بکش ایت۔ زیک تربت ءَ شھید پِدا چار راہ ءَ دو کسانیں زھگ شرھاتون ءُ اللہ بکش ءِ جون ایر اِت اَنت مرچی شھید بالاچ ءِ تیر سُپتگیں جون ایر اِنت بوت کنت باندا منی یا تئی جون ھمدا ایر بہ بیت اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔