زورانسری بیگواھی ءِ آماچیں میر تاج محمد سرپرہ ءِ کھول صالحہ مری ءَ گوشتگ کہ منی لوگ واجہ میر تاج محمد سرپرہ ریاستی ادارھاں 19جولائی 2020 ءَ چہ کراچی ءَ آوار جتگ ءُ برتگ کہ داں انگت ءَ بیگواہ اِنت ءُ منی لوگ واجہ ءِ بھت ءُ آئی ءِ جاہ ءِ بارو ءَ ھچ سرپدی نیست اِنت – درد سک مزن اِنت بلے انساپ ءِ پریات ءِ انگت ءَ مھکم اِنت ءُ من بے توار نہ باں-
ھمے ڈول ءَ بلوچ وائس جسٹس میر تاج محمد سرپرہ ءِ سلامتی ءِ یل کنگ ءِ لوٹ کتگ ءُ گوشتگ کہ ریاست یک شوربندی ءِ تک ءَ بلوچ انسانی بنچک ءَ ھلاس کنگ ءَ اِنت ، بلوچ راج ءِ زانتکاریں مردماں گچین کنگ ءُ بیگواہ کنگ ءَ انت یا کُشگ ءَ انت ئِے-
آئی ءَ گوشتگ ریاستی ادارھانی دست ءَ بلوچ نودربر سیاسی ءُ چاگردی باسک ،ٹیچر،ادیب،دانشور ھمے داب ءَ باپاری مردم ھم رکینگ بوگ ءَ نہ اَنت ،میر تاج محمد سرپرہ یک ٹکی رھشونے ءِ ھواری ءَ یک سیاسی،چاگردی ءُ باپاری مردمے بیتگ- آ ابید ءِ ملام ءَ زورانسری آوار جنی ءِ آماچ کنگ بیتگ کہ بنکی انسانی ھکانی تک ءَ سنگینیں جرمے زانگ بیت اِنت ما لوٹ کن ایں بلوچستان ءَ انسانی ھکانی لگتمالی ءِ درچ بند کنگ بہ بیت ءُ تاج محمد سرپرہ ءَ ھوار سرجمیں بیگواھیں مردم یل کنگ بہ بنت-