بھاولپور: بلوچ نودربرانی ھمک سالی دیوان بنام ءِ مبارک کازی برجم دارگ بوتگ

بلوچ اسٹوڈنس کونسل بھاولپور ءِ ھمک سالی بلوچی دیوان بنام ءِ شائر ء آشوب واجہ مبارک کازی ءِ یات ءَ برجم دارگ بوتگ – دیوان ءِ گچینی مھمان راجدپتر نویس ءُ ندکار ڈاکٹر فاروق بلوچ ءُ بلوچی زبان ءِ پروفیسر ڈاکٹر حامد علی بلوچ بوتگ انت –

ڈاکٹر فاروق بلوچ ءَ تران کنان ءَ گوشتگ کہ انگیر پہ زورگیری ءَ بلوچستانءَ اتکگ ءُ بلوچ ءِ گوستانک لپاشتگ ءُ بلوچ تاوان داتگ انت ـ چوش کہ زورگیراں گوں گلگ وا نہ بیت پرچا کہ اے آیانی کار انت کہ بلوچاں ایردست بہ کن انت بلے بژنی گپ اش انت کہ مئے دمگی نبشتکار ءُ ندکاراں انگریزانی داتگیں درشان مزنیں کچے ءَ دیم ءَ برتگ انت –

ڈاکٹر حامد بلوچ ءَ تران کنان ءَ گوشتگ کہ بلوچی زبان سک باز شاھگانیں زبان ئے کہ اے ھند ءُ دمگاں ھمے زبان ءَ گوں گپ جنگ بیت بلے اشی ءِ ھلاس کنگ ءِ سک باز جھد کنگ بوتگ – نوں وھد اتکگ کہ ھر ھما دمگاں زبان ءِ سر ءَ کار کنگ بہ بیت کہ اودا آئی ءِ ھلاس کنگ ءِ جھد کنگ بوتگ انت ھاسکر سند ءُ پنجاپ ءَ کہ اودا مزنیں کچے ءَ بلوچ نشتگ انت –

ڈاکٹر اے آر داد ءَ مبارک کازی ءِ زند، ازم ءُ کتابانء درگت ءَ وتی ھیال درشان اِتگ انت –

پینل ڈسکیشن ءِ بنگپ نوک آباد بوتگ ءُ اشی ءِ مھمان میردوست ءُ محمود بلوچ بوتگ انت کہ آیاں نوک آبادی ترام ءِ سر ءَ چمشانک داتگ – اشی ءَ پد مراگش ءَ شئیر ءُ شائری، ٹیبلو ،ڈرامہ ءُ دپگال گوشگ بوتگ انت –

مراگش ءِ گڈی بھر ساز ءُ زیمل بوتگ کہ استاد سلیم بلوچ ءُ سعید بلوچ ءَ وتی وشیں توار ءَ شئر الھان کتگ انت –